Deuteronomium

DEUTERONOMIUM 27

Cyfraith Duw wedi'i hysgrifennu ar garreg

¹ Yna dyma Moses, ac arweinwyr Israel gydag e, yn dweud wrth y bobl, “Cadwch y gorchmynion dw i'n eu rhoi i chi heddiw. ² Pan fyddwch chi'n croesi afon Iorddonen i'r wlad mae'r ARGLWYDD eich Duw yn ei rhoi i chi, rhaid i chi godi cerrig mawr ac yna rhoi plastr drostyn nhw. ³ Yna ysgrifennu copi o'r gorchmynion yma arnyn nhw. Wedyn gallwch fynd i mewn i'r wlad – tir ffrwythlon lle mae llaeth a mêl yn llifo, fel gwnaeth yr ARGLWYDD, Duw eich hynafiaid, ddweud wrthoch chi. ⁴ Mae'r cerrig yma i gael eu codi ar Fynydd Ebal, a'u gorchuddio gyda phlastr. ⁵ Yna dylech adeiladu allor yno i'r ARGLWYDD eich Duw – allor o gerrig sydd heb eu naddu gydag offer haearn. ⁶ Defnyddiwch gerrig cyfan i adeiladu'r allor, yna cyflwyno offrymau arni – offrymau i'w llosgi'n llwyr i'r ARGLWYDD eich Duw. ⁷ Hefyd offrymau i gydnabod daioni'r ARGLWYDD, a gallwch wledda a dathlu o flaen yr ARGLWYDD eich Duw. ⁸ Peidiwch anghofio ysgrifennu copi o'r gorchmynion yma ar y cerrig sy'n cael eu gosod i fyny, a gwnewch yn siŵr eu bod nhw i'w gweld yn glir.”

⁹ Yna dyma Moses, gyda'r offeiriaid o lwyth Lefi, yn dweud wrth bobl Israel: “Distawrwydd! Gwrandwch arna i, bobl Israel. Heddiw, dych chi wedi'ch gwneud yn bobl i'r ARGLWYDD. ¹⁰ Rhaid i chi wrando arno, a chadw'r rheolau a'r canllawiau dw i'n eu rhoi i chi.”

Canlyniad bod yn anufudd

¹¹ Yr un diwrnod, dyma Moses yn gorchymyn i'r bobl: ¹² “Ar ôl i chi groesi afon Iorddonen, mae'r llwythau canlynol i sefyll ar Fynydd Gerisim a bendithio'r bobl: Simeon, Lefi, Jwda, Issachar, Joseff a Benjamin. ¹³ Yna, mae'r llwythau eraill i sefyll ar Fynydd Ebal tra mae'r melltithion yn cael eu cyhoeddi: Reuben, Gad, Asher, Sabulon, Dan a Nafftali.

¹⁴ “Bydd y Lefiaid yn cyhoeddi'n uchel wrth bobl Israel:

• ¹⁵ ‘Melltith ar rywun sy'n cael crefftwr i gerfio delw neu i wneud eilun o fetel tawdd, ac yna'n ei osod i fyny i'w addoli (hyd yn oed o'r golwg) – mae peth felly yn hollol ffiaidd gan yr ARGLWYDD.’

r A bydd pawb yn ymateb, ‘Amen!’

• ¹⁶ ‘Melltith ar rywun sy'n dangos dim parch at ei dad a'i fam.’

r A bydd pawb yn ymateb, ‘Amen!’

• ¹⁷ ‘Melltith ar bwy bynnag sy'n symud terfyn i ddwyn tir oddi ar rywun arall.’

r A bydd pawb yn ymateb, ‘Amen!’

• ¹⁸ ‘Melltith ar bwy bynnag sy'n dweud wrth rywun dall am fynd y ffordd rong.’

r A bydd pawb yn ymateb, ‘Amen!’

• ¹⁹ ‘Melltith ar bwy bynnag sy'n gwrthod cyfiawnder i fewnfudwyr, plant amddifad a gweddwon.’

r A bydd pawb yn ymateb, ‘Amen!’

• ²⁰ ‘Melltith ar rywun sy'n cael rhyw gyda gwraig ei dad. Byddai hynny'n amharchu ei dad.’

r A bydd pawb yn ymateb, ‘Amen!’

• ²¹ ‘Melltith ar rywun sy'n cael rhyw gydag anifail.’

r A bydd pawb yn ymateb, ‘Amen!’

• ²² ‘Melltith ar rywun sy'n cael rhyw gyda'i chwaer – merch i'w dad neu'i fam.’

r A bydd pawb yn ymateb, ‘Amen!’

• ²³ ‘Melltith ar rywun sy'n cael rhyw gyda'i fam-yng-nghyfraith.’

r A bydd pawb yn ymateb, ‘Amen!’

• ²⁴ ‘Melltith ar bwy bynnag sy'n llofruddio rhywun arall.’

r A bydd pawb yn ymateb, ‘Amen!’

• ²⁵ ‘Melltith ar bwy bynnag sy'n derbyn tâl i lofruddio rhywun diniwed.’

r A bydd pawb yn ymateb, ‘Amen!’

• ²⁶ ‘Melltith ar bawb sydd ddim yn gwneud pob peth mae'r gyfraith yma'n ei ddweud.’

r A bydd pawb yn ymateb, ‘Amen!’

I'r pen