Pregethwr

Pregethwr 11

¹ “Bydd yn hael a rhannu dy gynnyrch ^Ref —

ac ymhen amser fe gei dy dalu'n ôl.

² Rho beth ohono i nifer o wahanol bobl,

wyddost ti ddim beth all fynd o'i le yn dy fywyd.”

³ Pan mae'r cymylau'n dduon,

byddan nhw'n tywallt glaw ar y ddaear.

Sdim ots i ba gyfeiriad mae coeden yn syrthio,

bydd yn aros lle syrthiodd.

⁴ Fydd ffermwr sy'n disgwyl tywydd perffaith byth yn hau,

a'r un sy'n gwylio pob cwmwl byth yn medi cynhaeaf.

⁵ Yn union fel na elli wybod sut mae anadl bywyd

yn mynd i gorff plentyn yng nghroth ei fam,

alli di ddim rhagweld beth fydd Duw'n ei wneud,

a fe sydd wedi creu popeth.

⁶ Hau dy had yn y bore,

a phaid segura gyda'r nos;

wyddost ti ddim pa un fydd yn llwyddo —

y naill neu'r llall, neu'r ddau fel ei gilydd.

Cyngor yr Athro - mwynhau bywyd

⁷ “Mae golau bywyd ^Ref mor felys,

ac mae'n hyfryd cael gweld yr haul!”

⁸ Os ydy rhywun yn cael oes hir,

dylai fwynhau'r blynyddoedd i gyd,

ond rhaid cofio fod dyddiau tywyll marwolaeth yn hirach.

Mae popeth sydd i ddod yn ddirgelwch!

Cyngor i bobl ifanc fod yn ddoeth

⁹ Ti'n ifanc! Mwynha dy hun

tra mae gen ti gyfle!

Cei ddigon o hwyl a sbri

pan wyt ti'n ifanc.

Gwna be fynni di,

beth bynnag sy'n cymryd dy ffansi —

ond cofia y bydd Duw

yn dy alw i gyfrif am y cwbl.

¹⁰ Paid cael dy lethu gan boenau bywyd,

a chadwa dy hun yn iach!

Dydy ieuenctid a gwallt du ddim yn para'n hir!

I'r pen