Pregethwr

Hafan

Hen Destament

Testament Newydd

Pregethwr 5

Dangos parch at Dduw

¹ Gwylia beth rwyt ti'n ei wneud wrth fynd i addoli Duw. Dos yno i wrando, ddim i gyflwyno offrwm ffyliaid, oherwydd dydy'r rheiny ddim yn gwybod eu bod nhw'n gwneud rhywbeth o'i le.

² Paid bod yn rhy barod dy dafod, ac ar ormod o frys i ddweud dy farn wrth Dduw. Mae Duw yn y nefoedd a thithau ar y ddaear. Dylet ti bwyso a mesur dy eiriau.

³ “Mae breuddwydion yn dod wrth boeni gormod,

a siarad ffôl wrth ddweud gormod.”

⁴ Pan wyt ti'n gwneud adduned i Dduw, paid oedi cyn ei chyflawni. Dydy Duw ddim yn cael ei blesio gan ffyliaid. Gwna beth rwyt ti wedi addo'i wneud. ⁵ Mae'n well peidio gwneud adduned yn y lle cyntaf na gwneud un ac wedyn peidio'i chyflawni!^Croes ⁶ Paid gadael i dy eiriau wneud i ti bechu, ac wedyn ceisio dadlau o flaen yr offeiriad, “camgymeriad oedd e!” Paid digio Duw, a gwneud iddo ddinistrio popeth rwyt wedi gweithio amdano!

⁷ “Mae gormod o freuddwydio

ac o wneud addewidion gwag.”

Dangos di barch at Dduw.

Gormes ac anghyfiawnder

⁸ Os wyt ti'n gweld pobl dlawd yn cael eu gormesu, hawliau'n cael eu gwrthod ac anghyfiawnder mewn rhyw wlad, paid rhyfeddu at y peth! Mae pob swyddog yn atebol i'w oruchwyliwr, ac mae rhai uwch fyth dros y rheiny wedyn. ⁹ Mae cynnyrch y tir i fod i bawb — ac mae'r brenin i fod i feithrin hyn! ^Ref

Nid arian ydy'r ateb

¹⁰ “Dydy rhywun sydd ag obsesiwn am arian

byth yn fodlon fod ganddo ddigon;

na'r un sy'n caru cyfoeth

yn hapus gyda'i enillion.”

Dydy e'n gwneud dim sens!

¹¹ “Po fwya'r llwyddiant,

mwya'r bobl sydd i'w cynnal ganddo.”

Felly beth mae'r perchennog yn ei ennill heblaw fod ganddo rywbeth i edrych arno?

¹² “Mae gorffwys yn felys i weithiwr cyffredin,

faint bynnag sydd ganddo i'w fwyta,

ond mae'r ffaith fod gan y cyfoethog fwy na digon

yn ei rwystro rhag cysgu'n dawel.”

¹³ Dyma rywbeth ofnadwy dw i wedi sylwi arno, ond mae'n digwydd o hyd: Pobl yn cadw eu cyfoeth iddyn nhw eu hunain rhag ofn i rhyw anffawd ddigwydd. ¹⁴ Ond yna mae'n colli'r cwbl drwy ryw bwl o anlwc. Er ei fod wedi cael mab, does ganddo ddim i'w basio ymlaen i'r mab hwnnw. ¹⁵ Mae plentyn yn cael ei eni i'r byd heb ddim, ac mae'n gadael y byd heb ddim. Does neb yn gallu mynd a'i gyfoeth gydag e. ¹⁶ Mae'n beth trist ofnadwy. Yn union fel mae'n dod i'r byd heb ddim, mae'n gadael heb ddim. Felly faint gwell ydy e? Beth ydy'r pwynt ymdrechu i ddim byd? ¹⁷ Mae'n treulio ei fywyd i gyd dan gwmwl marwolaeth! — yn rhwystredig, yn dioddef o salwch ac yn flin.

Cyngor yr Athro - mwynhau bywyd

¹⁸ Dim ond un peth dw i'n ei weld sy'n dda ac yn llesol go iawn: fod rhywun yn bwyta ac yn yfed ac yn mwynhau ei waith caled yn y byd yma am yr ychydig amser mae Duw wedi ei roi iddo. Dyna ei wobr. ¹⁹ Ac os ydy Duw wedi rhoi cyfoeth ac eiddo iddo, a'r gallu i'w mwynhau, derbyn ei wobr a chael pleser yn y cwbl mae'n ei wneud — rhodd gan Dduw ydy'r pethau yma i gyd. ²⁰ Pan mae Duw wedi llenwi ei fywyd â llawenydd, dydy rhywun felly ddim yn poeni rhyw lawer fod bywyd mor fyr.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity