Exodus

Hafan

Hen Destament

Testament Newydd

EXODUS 25

Sut i godi'r Tabernacl

(Exodus 35:4-9)

¹ Dyma'r ARGLWYDD yn dweud wrth Moses: ² “Dwed wrth bobl Israel am gasglu rhoddion i mi gan bawb sy'n awyddus i gyfrannu. ³ Dyma beth allan nhw ei gyfrannu: aur, arian, pres, ⁴ edau las, porffor a coch, lliain main drud, blew gafr, ⁵ crwyn hyrddod wedi'u llifo'n goch, crwyn môr-fuchod, coed acasia, ⁶ olew i'r lampau, perlysiau i wneud yr olew eneinio a'r arogldarth persawrus, ⁷ onics a gemau eraill i'w gosod ar yr effod a'r boced fydd yn mynd dros y frest. ⁸ Dw i eisiau iddyn nhw godi lle sbesial i mi gael byw yn eu canol nhw. ⁹ Dw i eisiau i'r Tabernacl, a popeth fydd yn mynd i mewn ynddo, gael eu gwneud yn union fel dw i'n dangos i ti.

Yr Arch

(Exodus 37:1-9)

¹⁰ “Maen nhw i wneud Arch, sef cist o goed acasia – 110 centimetr o hyd, 66 centimetr o led a 66 centimetr o uchder. ¹¹ Yna ei gorchuddio gyda haen o aur pur (y tu mewn a'r tu allan), a gosod border aur o'i chwmpas i'w haddurno. ¹² Yna gwneud pedwar cylch aur, a'u gosod nhw ar draed y gist, dau bob ochr. ¹³ A dau bolyn o goed acasia wedi'u gorchuddio gydag aur. ¹⁴ Mae'r polion i ffitio drwy'r cylchoedd bob ochr i'r Arch, ac i'w defnyddio i'w chario hi. ¹⁵ Mae'r polion yma i aros yn eu lle yn y cylchoedd bob amser – rhaid peidio eu tynnu nhw allan. ¹⁶ Wedyn mae Llechi'r Dystiolaeth, dw i'n eu rhoi i ti, i'w gosod y tu mewn i'r Arch.

¹⁷ “Yna gwneud caead o aur pur i'r Arch – 110 centimetr o hyd, a 66 centimetr o led. ^18-19 Yna gwneud dau gerwb o aur wedi'i guro (gwaith morthwyl) – un bob pen i'r caead, yn un darn gyda'r caead ei hun. ²⁰ Mae'r cerwbiaid i fod yn wynebu'i gilydd, yn edrych i lawr ar y caead, ac yn estyn eu hadenydd dros yr Arch. ²¹ Mae'r caead i'w osod ar yr arch, a Llechi'r Dystiolaeth i'w gosod y tu mewn iddi. ²² Dyma ble bydda i'n dy gyfarfod di. Rhwng y ddau gerwb sydd uwchben caead yr Arch, bydda i'n siarad â ti, ac yn dweud beth dw i eisiau i bobl Israel ei wneud.

Bwrdd y bara i'w gyflwyno i Dduw

(Exodus 37:10-16)

²³ “Rwyt i wneud bwrdd o goed acasia – 88 centimetr o hyd, 44 centimetr o led, a 66 centimetr o uchder. ²⁴ Mae'r bwrdd i gael ei orchuddio gyda haen o aur pur, a border aur i'w osod o'i gwmpas i'w addurno. ²⁵ Ac mae croeslath 75 milimetr o drwch i fod o'i gwmpas – hwnnw hefyd wedi'i addurno yr un fath â'r border. ²⁶ Yna gwneud pedwar cylch aur, a'u gosod nhw ar bedair cornel y bwrdd lle mae'r coesau, ²⁷ wrth ymyl y croeslath. Mae'r cylchoedd ar gyfer rhoi'r polion drwyddyn nhw i gario'r bwrdd. ²⁸ Mae'r polion eu hunain i gael eu gwneud o goed acasia wedi'u gorchuddio gydag aur. ²⁹ Hefyd platiau, pedyll, jygiau a phowlenni o aur pur, i dywallt yr offrymau o ddiod. ³⁰ Mae'r bara cysegredig i gael ei osod o mlaen i ar y bwrdd yma bob amser.

Stand i ddal y lampau – y Menora

(Exodus 37:17-24)

³¹ “Yna gwneud y menora (sef stand i ddal y lampau) allan o aur pur – gwaith morthwyl, sef aur wedi'i guro. Mae'r cwbl i fod yn un darn – y droed, y goes, a'r cwpanau siâp blodyn gyda calycs oddi tanyn nhw. ³² Mae chwe cangen i ymestyn allan o ochrau'r menora, tair bob ochr. ³³ Mae tair cwpan siâp blodyn almon i fod ar bob cangen – pob blodyn gyda calycs a petalau. ³⁴ Ac ar brif goes y menora, pedair cwpan siâp blodyn almon gyda calycs a petalau; ³⁵ un dan y pâr cyntaf o ganghennau, un dan yr ail, ac un dan y trydydd. ³⁶ Mae'r cwbl i'w wneud o un darn o aur pur wedi'i guro – gwaith morthwyl. ³⁷ Yna rhaid gwneud saith lamp, a'u gosod nhw arni fel eu bod yn goleuo o'i blaen hi. ³⁸ Mae'r gefeiliau a'r padellau hefyd i'w gwneud o aur pur. ³⁹ Dylid defnyddio 35 cilogram o aur pur i wneud y menora a'r offer i gyd. ⁴⁰ Gwna'n siŵr dy fod yn eu gwneud nhw yn union fel yn y cynllun gafodd ei ddangos i ti ar y mynydd.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity