Eseciel

Hafan

Hen Destament

Testament Newydd

ESECIEL 29

Yr Aifft

¹ Roedd hi ddeg mlynedd ar ôl i ni gael ein cymryd yn gaeth i Babilon, ar y deuddegfed diwrnod o'r degfed mis. ^Ref Dyma'r ARGLWYDD yn rhoi'r neges yma i mi: ² “Ddyn, dw i eisiau i ti droi i wynebu'r Pharo, ^Ref brenin yr Aifft, a proffwydo yn ei erbyn e a holl wlad yr Aifft. ³ Dyma rwyt ti i'w ddweud, ‘Dyma mae'r ARGLWYDD, y Meistr, yn ei ddweud:

Dw i'n mynd i ddelio gyda ti!

y Pharo, brenin yr Aifft;

y ddraig fawr sy'n gorwedd

yng nghanol ei ffosydd.

“Fi piau afon Nîl,” meddet ti,

“a fi sydd wedi'i chreu hi.”

⁴ Bydda i'n rhoi bachyn yn dy ên

ac yn dy lusgo allan o'r dŵr

gyda physgod o'r ffosydd yn

glynu wrth dy groen.

⁵ Bydda i'n dy daflu i'r anialwch,

ti a physgod y ffosydd.

Byddi'n gorwedd, heb dy gladdu,

i farw ar dir agored –

yn fwyd i'r anifeiliaid ac i'r adar.

⁶ Yna bydd pawb sy'n byw yn yr Aifft

yn gweld mai fi ydy'r ARGLWYDD.

Rwyt wedi bod yn ffon fagl wan fel brwynen

i bobl Israel bwyso arni.

⁷ Dyma nhw'n gafael ynot, ond dyma ti'n torri

ac yn bwrw eu hysgwydd o'i lle.

Wrth iddyn nhw bwyso arnat dyma ti'n hollti

a gadael eu cluniau'n sigledig.^Croes

⁸ “‘Felly, dyma mae'r ARGLWYDD, y Meistr, yn ei ddweud: Dw i'n anfon byddin i ymosod arnat ti, a bydd yr holl bobl a'r anifeiliaid yn cael eu lladd. ⁹ Bydd yr Aifft yn dir diffaith gwag. Byddan nhw'n deall wedyn mai fi ydy'r ARGLWYDD.

“‘Am dy fod wedi dweud, “Fi piau afon Nîl, a fi sydd wedi'i chreu hi,” ¹⁰ dw i'n mynd i ddelio gyda ti a dy ffosydd. Dw i'n mynd i droi gwlad yr Aifft yn anialwch diffaith yr holl ffordd o Migdol yn y gogledd i Aswan yn y de, sydd ar y ffin gydag Ethiopia. ^Ref ¹¹ Fydd neb yn gallu byw yno am bedwar deg o flynyddoedd – fydd dim pobl nac anifeiliaid yn crwydro yno. ¹² Bydda i'n gwneud gwlad yr Aifft yn anialwch gwaeth nag unrhyw wlad. Bydd ei threfi a'i dinasoedd yn adfeilion. Bydd pobl yr Aifft yn cael eu gyrru ar chwâl drwy'r gwledydd i gyd.

¹³ “‘Ond yna, dyma mae'r ARGLWYDD, y Meistr, yn ei ddweud: Ar ddiwedd y pedwar deg mlynedd bydda i'n casglu pobl yr Aifft o'r gwledydd lle roedden nhw ar chwâl. ¹⁴ Bydda i'n adfer sefyllfa pobl yr Aifft a dod â nhw yn ôl i ardal Pathros, i wlad eu mebyd. Ond gwlad ddi-nod fydd yr Aifft. ¹⁵ Bydd hi'n un o'r gwledydd lleia dylanwadol, a fydd hi byth yn rheoli gwledydd eraill eto. ¹⁶ A fydd Israel ddim yn pwyso arni byth eto. Bydd hi'n atgoffa Israel o'i phechod yn troi at yr Aifft am help. Byddan nhw'n deall wedyn mai fi ydy'r ARGLWYDD.’”

Selio Tynged yr Aifft

¹⁷ Roedd hi ddau ddeg saith mlynedd ar ôl i ni gael ein cymryd yn gaeth i Babilon, ar ddiwrnod cynta'r flwyddyn. ^Ref A dyma fi'n cael neges gan yr ARGLWYDD: ¹⁸ “Ddyn, mae byddin Nebwchadnesar brenin Babilon wedi brwydro'n galed yn erbyn Tyrus. Maen nhw wedi gweithio'u bysedd at yr asgwrn, ^Ref ond dydy'r milwyr wedi ennill dim ar ôl yr holl ymdrech! ¹⁹ Felly dyma mae'r ARGLWYDD, y Meistr, yn ei ddweud: Dw i'n mynd i roi gwlad yr Aifft yn nwylo Nebwchadnesar, brenin Babilon. Bydd e'n cymryd holl gyfoeth y wlad ac yn ysbeilio'i thrysorau i dalu cyflog i'w filwyr. ²⁰ Dw i'n mynd i roi gwlad yr Aifft iddo i'w ddigolledu am yr holl ymdrech yn ymosod ar Tyrus. Mae e wedi bod yn gwneud hyn i mi.” Dyna neges y Meistr, yr ARGLWYDD.

²¹ “Bryd hynny bydda i'n gwneud Israel yn wlad gref unwaith eto, a bydd pobl yn gwrando ar beth rwyt ti'n ddweud. Byddan nhw'n deall wedyn mai fi ydy'r ARGLWYDD.”

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity