Genesis

Hafan

Hen Destament

Testament Newydd

GENESIS 25

Disgynyddion eraill Abraham

(1 Cronicl 1:32-33)

¹ Roedd Abraham wedi cymryd gwraig arall o'r enw Cetwra. ² Hi oedd mam Simran, Iocsan, Medan, Midian, Ishbac a Shwach. ³ Iocsan oedd tad Sheba a Dedan. A disgynyddion Dedan oedd yr Ashwriaid, y Letwshiaid a'r Lewmiaid. ⁴ Wedyn meibion Midian oedd Effa, Effer, Chanoch, Abida ac Eldaä. Roedd y rhain i gyd yn ddisgynyddion i Cetwra.

⁵ Gadawodd Abraham bopeth oedd ganddo i'w fab Isaac. ⁶ Roedd wedi anfon meibion ei bartneriaid ^Ref eraill i ffwrdd i'r dwyrain, yn bell oddi wrth ei fab Isaac, ac wedi rhoi anrhegion iddyn nhw bryd hynny.

Abraham yn marw

⁷ Buodd Abraham fyw i fod yn 175 oed. ⁸ Roedd yn hen ddyn pan fuodd farw, wedi byw bywyd llawn. ^9-10 Cafodd ei gladdu gan ei feibion Isaac ac Ishmael yn ogof Machpela (ar y darn tir oedd i'r dwyrain o Mamre – sef y tir roedd Abraham wedi'i brynu gan Effron, un o ddisgynyddion Heth). Cafodd Abraham ei gladdu yno gyda'i wraig Sara.

¹¹ Ar ôl i Abraham farw, dyma Duw yn bendithio Isaac. Aeth i fyw wrth ymyl Beër-lachai-roi.

Disgynyddion Ishmael

(1 Cronicl 1:28-31)

¹² Dyma hanes teulu Ishmael, y mab gafodd Abraham gan Hagar, morwyn Eifftaidd Sara:

¹³ Enwau meibion Ishmael, mewn trefn (o'r hynaf i'r ifancaf): Nebaioth oedd ei fab hynaf, wedyn Cedar, Adbe-el, Mifsam, ¹⁴ Mishma, Dwma, Massa, ¹⁵ Hadad, Tema, Ietwr, Naffish a Cedema. ¹⁶ Y rhain oedd meibion Ishmael, a chafodd y pentrefi ble roedden nhw'n byw eu henwi ar eu holau. Roedd y deuddeg ohonyn nhw yn benaethiaid ar eu llwythau.

¹⁷ Roedd Ishmael yn 137 oed pan fuodd farw a mynd at ei hynafiaid. ¹⁸ Roedd ei ddisgynyddion yn byw yn yr ardal rhwng Hafila a Shwr, sy'n ffinio â'r Aifft, i gyfeiriad Ashŵr. Roedd Ishmael yn tynnu'n groes i'w deulu ei hun.

Geni Jacob ac Esau

¹⁹ Dyma hanes teulu Isaac, mab Abraham:

Abraham oedd tad Isaac. ²⁰ Roedd Isaac yn 40 oed pan briododd Rebeca (sef merch Bethwel yr Aramead o Padan-aram, a chwaer Laban yr Aramead). ²¹ Roedd Rebeca'n methu cael plant, felly dyma Isaac yn gweddïo ar yr ARGLWYDD drosti, a dyma hi'n beichiogi. ²² Roedd hi'n disgwyl gefeilliaid, ond roedden nhw'n gwthio ac yn taro ei gilydd yn ei chroth. “Pam mae hyn yn digwydd i mi?” ^Ref gofynnodd. Aeth i ofyn i'r ARGLWYDD. ²³ A dyma ddwedodd yr ARGLWYDD wrthi:

“Bydd dwy wlad yn dod o'r bechgyn yn dy groth.

Dau grŵp o bobl fydd yn erbyn ei gilydd.

Bydd un yn gryfach na'r llall,

a bydd y mab hynaf yn was i'r ifancaf.”

²⁴ Dyma'r amser yn dod i'r gefeilliaid gael eu geni. ²⁵ Daeth y cyntaf allan o'r groth yn gochlyd i gyd ac yn flewog fel dilledyn, felly dyma nhw'n ei alw yn Esau. ^Ref ²⁶ Wedyn daeth y llall, yn cydio'n dynn yn sawdl Esau, felly dyma nhw'n ei alw yn Jacob. ^Ref Roedd Isaac yn 60 oed pan gawson nhw eu geni. ’

²⁷ Pan oedd y bechgyn wedi tyfu, roedd Esau yn heliwr gwych, wrth ei fodd yn mynd allan i'r wlad. Ond roedd Jacob yn fachgen tawel, yn hoffi aros gartref. ²⁸ Esau oedd ffefryn Isaac, am ei fod yn mwynhau bwyta'r anifeiliaid roedd wedi'u hela. Ond Jacob oedd ffefryn Rebeca.

Esau'n gwerthu ei hawliau fel y mab hynaf

²⁹ Un tro pan oedd Jacob yn coginio cawl, dyma Esau yn dod i mewn wedi blino'n lân ar ôl bod allan yn hela. ³⁰ “Dw i bron marw eisiau bwyd,” meddai. “Ga i beth o'r cawl coch yna i'w fwyta gen ti?” (Dyna sut y daeth i gael ei alw yn Edom. ^Ref ) ’³¹ “Cei os gwnei di werthu dy hawliau fel y mab hynaf i mi,” meddai Jacob. ³² Atebodd Esau, “Fydd hawliau'r mab hynaf yn werth dim byd i mi os gwna i farw!” ³³ “Rhaid i ti addo i mi ar lw,” meddai Jacob. Felly dyma Esau yn addo ar lw, ac yn gwerthu hawliau'r mab hynaf i Jacob; ³⁴ a rhoddodd Jacob fara a chawl ffacbys i Esau. Ar ôl iddo fwyta ac yfed, cododd Esau ar ei draed a gadael. Roedd yn dangos ei fod yn malio dim am ei hawliau fel y mab hynaf.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity