Hebreaid

Hafan

Hen Destament

Testament Newydd

HEBREAID 8

Archoffeiriad y drefn newydd

¹ Y pwynt ydy hyn: mae'r Archoffeiriad sydd gynnon ni wedi eistedd yn y sedd anrhydedd yn y nefoedd, ar yr ochr dde i'r Duw Mawr ei hun.^Croes ² Dyna'r cysegr mae hwn yn gweini ynddo – y ganolfan addoliad go iawn sydd wedi'i chodi gan yr Arglwydd ei hun, a dim gan unrhyw berson dynol. ³ A chan fod rhaid i bob archoffeiriad gyflwyno rhoddion ac aberthau i Dduw, roedd rhaid i Iesu hefyd fod â rhywbeth ganddo i'w gyflwyno.

⁴ Petai'r gweini hwn yn digwydd ar y ddaear, fyddai Iesu ddim yn gallu bod yn offeiriad, am fod offeiriaid eisoes ar gael i gyflwyno'r rhoddion mae'r Gyfraith Iddewig yn eu gorchymyn. ⁵ Ond dim ond copi o'r ganolfan addoliad go iawn yn y nefoedd ydy'r cysegr maen nhw'n gweini ynddo. Dyna pam wnaeth Duw roi'r rhybudd hwn i Moses pan oedd yn bwriadu codi'r babell yn ganolfan addoliad: “Gwna'n siŵr dy fod yn gwneud popeth yn union fel mae yn y cynllun welaist ti ar y mynydd.” ^Croes ⁶ Ond mae'r gwaith offeiriadol gafodd ei roi i Iesu yn llawer iawn pwysicach na'r gwaith maen nhw'n ei wneud fel offeiriaid. Ac mae'r ymrwymiad mae Iesu'n ganolwr iddo yn well na'r hen un – mae wedi'i wneud yn ‛gyfraith‛ sy'n addo pethau llawer gwell.

⁷ Petai'r drefn gyntaf wedi bod yn ddigonol fyddai dim angen un arall. ⁸ Ond roedd bai ar y bobl yng ngolwg Duw, a dyna pam ddwedodd e:

“‘Mae'r amser yn dod,’ meddai'r Arglwydd,

‘pan fydda i'n gwneud ymrwymiad newydd

gyda phobl Israel a Jwda.’

⁹ ‘Fydd hwn ddim yr un fath â'r un

wnes i gyda'u hynafiaid

(pan afaelais yn eu llaw

a'u harwain allan o'r Aifft).

Wnaethon nhw ddim cadw

eu hochr nhw o'r cytundeb,

felly dyma fi'n troi fy nghefn arnyn nhw,’

meddai'r Arglwydd.

¹⁰ ‘Dyma'r ymrwymiad fydda i'n ei wneud

gyda phobl Israel bryd hynny,’ meddai'r Arglwydd:

‘Bydd fy neddfau'n glir yn eu meddyliau

ac wedi'u hysgrifennu ar eu calonnau.

Fi fydd eu Duw nhw,

a nhw fydd fy mhobl i.

¹¹ Fyddan nhw ddim yn gorfod dysgu pobl eraill,

a dweud wrth ei gilydd,

“Rhaid i ti ddod i nabod yr Arglwydd,”

achos bydd pawb yn fy nabod i,

o'r lleia i'r mwya.

¹² Bydda i'n maddau iddyn nhw am y pethau wnaethon nhw o'i le,

ac yn anghofio'u pechodau am byth.’” ^Croes

¹³ Drwy ddefnyddio'r gair ‛newydd‛ i ddisgrifio'r ymrwymiad yma, mae Duw'n dweud fod y llall yn hen. Os ydy rhywbeth yn hen ac yn perthyn i'r oes o'r blaen, yn fuan iawn mae'n mynd i ddiflannu'n llwyr!

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity