Hosea

HOSEA 11

Cariad Duw at ei bobl

¹ Pan oedd Israel yn blentyn rôn i'n ei garu,

a galwais fy mab allan o'r Aifft.^Croes

² Ond po fwya roeddwn i'n galw,

pellaf roedden nhw'n mynd.

Roedden nhw'n aberthu i ddelwau o Baal,

a llosgi arogldarth i eilunod.

³ Fi ddysgodd Effraim ^Ref i gerdded;

a'i arwain gerfydd ei law.

Ond wnaeth ei bobl ddim cydnabod

mai fi ofalodd amdanynt.

⁴ Fi wnaeth eu harwain gyda thennyn lledr –

tennyn cariad.

Fi gododd yr iau oddi ar eu gwddf,

a fi wnaeth blygu i'w bwydo.

Cosb am fod yn anufudd

⁵ Byddan nhw'n mynd yn ôl i'r Aifft!

Bydd Asyria'n eu rheoli,

am iddyn nhw wrthod troi'n ôl ata i.

⁶ Bydd cleddyf yn fflachio'n eu trefi.

Bydd y gelyn yn malu'r giatiau,

a'u lladd er gwaetha'u cynlluniau.

⁷ Mae fy mhobl yn mynnu troi cefn arna i.

Maen nhw'n galw ar Baal,

ond fydd e byth yn eu helpu nhw!

Cariad rhyfeddol Duw

⁸ Sut alla i dy roi heibio, Effraim?

Ydw i'n mynd i adael i ti fynd, Israel?

Sut alla i dy roi heibio fel Adma?

Ydw i'n mynd i dy drin fel Seboïm? ^Ref

Na, dw i wedi newid fy meddwl!

Mae tosturi wedi cynnau'n fy nghalon.

⁹ Alla i ddim gadael llonydd i'm llid losgi.

Alla i ddim dinistrio Effraim yn llwyr!

Duw ydw i, nid dyn fel chi,

yr Un Sanctaidd – dw i ddim am ddod i ddinistrio.

Bydd Duw yn dod â'i bobl yn ôl i Israel

¹⁰ Bydd yr ARGLWYDD yn rhuo fel llew,

a byddan nhw'n ei ddilyn eto.

Pan fydd e'n rhuo, bydd ei blant yn dod

o'r gorllewin yn llawn cyffro.

¹¹ Dod ar frys fel adar o'r Aifft,

neu golomennod yn hedfan o Asyria.

“Bydda i'n eu casglu nhw'n ôl i'w cartrefi.”

—yr ARGLWYDD sy'n dweud hyn.

Achos Duw yn erbyn Israel

¹² Ac eto celwydd Effraim sydd o'm cwmpas;

dydy pobl Israel yn gwneud dim byd ond twyllo.

Ac mae Jwda'n crwydro yn ôl ac ymlaen oddi wrth Dduw –

yr Un Sanctaidd, sydd mor ffyddlon.

I'r pen