Hosea

HOSEA 5

Bydd Israel a Jwda'n cael eu barnu

¹ Gwrandwch, chi offeiriaid!

Daliwch sylw, bobl Israel!

Clywch, chi'r teulu brenhinol!

Mae'r farn ar fin dod arnoch!

Dych chi wedi bod fel trap i bobl Mitspa,

a rhwyd i ddal pobl Tabor;

² yn wrthryfelwyr wedi achosi lladdfa ddifrifol,

a bydda i'n eich cosbi chi i gyd.

³ Dw i'n gwybod yn iawn am Effraim. ^Ref

Dydy Israel ddim yn gallu cuddio oddi wrtho i!

Rwyt ti Effraim wedi troi at buteinio –

mae Israel wedi'i llygru'n llwyr.

⁴ Mae eu drygioni'n eu rhwystro

rhag troi yn ôl at eu Duw.

Mae puteindra ysbrydol wedi'u meddiannu,

a dŷn nhw ddim yn nabod yr ARGLWYDD.

⁵ Mae balchder Israel yn tystio yn ei herbyn.

Bydd Israel ac Effraim yn syrthio o achos eu drygioni.

A bydd Jwda, hefyd, yn syrthio gyda nhw.

⁶ Wedyn, byddan nhw'n mynd at yr ARGLWYDD

gyda'i defaid a'u geifr a'u bustych.

Ond bydd yn rhy hwyr! Bydd e wedi'u gadael nhw.

⁷ Maen nhw wedi bradychu'r ARGLWYDD

ac maen nhw wedi cael plant siawns.

Yn fuan iawn, ar ŵyl y lleuad newydd,

byddan nhw a'u tir yn cael eu difa.

Rhybudd fod y farn yn dod

⁸ Chwythwch y corn hwrdd ^Ref yn Gibea!

Canwch utgorn yn Rama!

Rhybuddiwch bobl Beth-afen! ^Ref

Ti fydd gyntaf, Benjamin!

⁹ Bydd Effraim yn cael ei dinistrio ar ddydd y cosbi!

Mae beth dw i'n ddweud wrth lwythau Israel

yn mynd i ddigwydd.

¹⁰ Mae arweinwyr Jwda fel rhai sy'n symud terfyn i ddwyn tir;^Croes

a bydda i'n tywallt fy llid arnyn nhw fel llifogydd!

¹¹ Bydd Effraim ^Ref yn cael ei orthrymu,

a'i sathru pan fydda i'n barnu;

am ei fod wedi penderfynu dilyn eilunod diwerth.

¹² Bydda i fel gwyfyn yn difa Effraim,

fel pydredd i bobl Jwda.

¹³ Pan welodd Effraim ei fod yn sâl,

a Jwda'n gweld ei ddolur,

dyma Effraim yn troi at Asyria

am help gan ‛y brenin mawr‛.

Ond dydy e ddim yn gallu dy helpu.

Fydd e ddim yn gwella dy glwyf!

¹⁴ Fi sy'n ymosod ar Effraim a Jwda,

fel llew yn rhwygo'i ysglyfaeth.

Fi – ie, fi! Bydda i'n eu rhwygo nhw'n ddarnau

a'u cario nhw i ffwrdd.

Fydd neb yn gallu eu helpu.

¹⁵ Bydda i'n mynd yn ôl i'm ffau

nes byddan nhw'n cyfaddef eu bai.

Wedyn, byddan nhw'n chwilio amdana i;

yn eu helbul, byddan nhw'n chwilio'n daer amdana i:

I'r pen