Hosea

HOSEA 7

¹ dw i eisiau iacháu Israel.

Ond mae pechod Effraim yn y golwg,

a drygioni Samaria ^Ref mor amlwg.

Maen nhw mor dwyllodrus!

Mae lladron yn torri i mewn i'r tai,

a gangiau'n dwyn ar y strydoedd.

² Dŷn nhw ddim yn sylweddoli

fy mod i'n gweld y drwg i gyd.

Mae eu drygioni fel baw drostyn nhw –

dw i'n ei weld o flaen fy llygaid!

³ Mae'r brenin yn mwynhau gweld drwg

a'r tywysogion yn twyllo.

⁴ Maen nhw i gyd yn godinebu!

Maen nhw fel popty crasboeth –

does dim rhaid i'r pobydd brocio'r tân

tra mae'n tylino'r toes,

na pan mae'n cael ei bobi!

⁵ Mae'r brenin yn cynnal parti,

ac mae'r tywysogion yn meddwi;

Mae e'n cynllwynio gyda phaganiaid

⁶ ac yn troi ata i gan fwriadu brad.

Bwriadau sydd fel popty poeth,

yn mudlosgi drwy'r nos

ac yn cynnau'n fflamau tân yn y bore.

⁷ Maen nhw i gyd fel popty crasboeth,

yn lladd eu llywodraethwyr.

Mae eu brenhinoedd i gyd wedi syrthio,

a does dim un yn galw arna i!

Israel a'r Cenhedloedd

⁸ Mae Effraim ^Ref wedi cymysgu gyda'r cenhedloedd.

Mae fel bara tenau wedi'i losgi ar un ochr!

⁹ Mae estroniaid yn sugno'i nerth,

a dydy e ddim wedi sylwi!

Mae fel hen ddyn a'i wallt yn britho

heb iddo sylwi!

¹⁰ Mae balchder Israel yn tystio yn ei herbyn.

Wnân nhw ddim troi'n ôl at yr ARGLWYDD eu Duw!

Er gwaetha'r cwbl maen nhw'n gwrthod troi ato.

¹¹ Mae Effraim fel colomen ddisynnwyr, hawdd i'w thwyllo –

mae'n galw ar yr Aifft am help,

ac wedyn yn troi at Asyria.

¹² Bydda i'n taflu fy rhwyd i'w rhwystro rhag hedfan;

bydda i'n eu dal nhw fel dal adar,

ac yn eu cosbi nhw pan glywa i nhw'n heidio at ei gilydd.

¹³ Gwae nhw am geisio dianc oddi wrtho i!

Dinistr gân nhw am wrthryfela yn fy erbyn i!

Sut alla i eu gollwng nhw'n rhydd

pan maen nhw'n dweud celwydd amdana i?

¹⁴ Dŷn nhw ddim yn galw arna i o ddifrif.

Maen nhw'n gorweddian ar eu gwlâu yn gweiddi,

a thorri eu hunain â chyllyll ^Ref wrth ofyn am ŷd a grawnwin.

Maen nhw wedi troi cefn arna i,

¹⁵ er mai fi wnaeth eu dysgu nhw.

Fi wnaeth eu gwneud nhw'n gryf,

ond maen nhw'n cynllwynio i wneud drwg i mi.

¹⁶ Maen nhw'n troi at Baal!

Maen nhw fel bwa llac, yn dda i ddim.^Croes

Byddan nhw'n cael eu lladd gan y gelyn

am siarad mor hy yn fy erbyn.

Byddan nhw'n destun sbort i bobl yr Aifft.

I'r pen