Hosea

HOSEA 8

Barn Duw ar Israel

¹ Canwch y corn hwrdd! ^Ref Rhybuddiwch y bobl!

Mae eryr yn hofran uwch teml yr ARGLWYDD.

Maen nhw wedi torri amodau'r ymrwymiad gyda mi,

ac wedi gwrthryfela yn erbyn fy nghyfraith.

² Mae Israel yn galw arna i,

“O Dduw, dŷn ni'n dy gydnabod di!”

³ Ond mae'n rhy hwyr! Mae Israel wedi gwrthod y da, ^Ref

a bydd y gelyn yn ei erlyn.

⁴ Maen nhw wedi dewis brenhinoedd

heb ofyn i mi.

Maen nhw wedi urddo arweinwyr

heb i mi gytuno.

Maen nhw wedi gwneud eilunod

gyda'r arian a'r aur oedd ganddyn nhw –

ffordd dda i ddinistrio'i hunain!

⁵ Dw i wedi gwrthod tarw Samaria.^Croes

Dw i wedi digio'n lân gyda nhw!

Fydd hi ddim yn hir nes i mi eu cosbi nhw,

⁶ er mai pobl Israel ydyn nhw!

Cafodd y peth hwnnw ei greu gan grefftwr –

nid Duw ydy e!

Felly, bydd tarw Samaria

yn cael ei falu'n ddarnau mân!

⁷ Maen nhw wedi hau gwynt,

ond byddan nhw'n medi corwynt!

‛Dydy ŷd heb ben ddim yn rhoi blawd.‛

Hyd yn oed petai'n rhoi cnwd,

pobl estron fydd yn ei fwyta.

⁸ Bydd Israel wedi'i llyncu gan y cenhedloedd;

bydd fel darn o sbwriel wedi'i daflu i ffwrdd.

⁹ Maen nhw wedi mynd i fyny i Asyria –

fel asyn gwyllt yn crwydro'n unig.

Mae Effraim ^Ref wedi bod yn talu am ei chariadon.

¹⁰ Am ei bod nhw wedi talu am gariad y cenhedloedd,

dw i'n mynd i'w casglu nhw i gael eu barnu,

a byddan nhw'n gwywo dan orthrwm y brenin mawr.

¹¹ Er fod Effraim wedi adeiladu allorau i aberthu dros bechod,

maen nhw wedi'u troi yn allorau i bechu!

¹² Er fy mod wedi rhoi cyfreithiau manwl iddyn nhw,

maen nhw'n trin y cwbl fel rhywbeth hollol ddieithr!

¹³ Maen nhw'n dod i offrymu aberthau

er mwyn cael bwyta'r cig!

Dydy'r ARGLWYDD ddim yn eu derbyn nhw!

Yn fuan iawn, bydd yn delio gyda'i pechodau nhw,

ac yn eu cosbi nhw;

byddan nhw'n mynd yn ôl i'r Aifft! ^Ref

¹⁴ Mae Israel wedi anghofio'i Chrëwr.

Mae Jwda wedi adeiladu palasau,

a chryfhau ei chaerau amddiffynnol. ^Ref

Ond bydda i'n anfon tân i'w threfi,

ac yn llosgi ei phalasau.

I'r pen