Yn ôl

Eseia

Llyfrau

Hafan

Hen Destament

Testament Newydd

ESEIA 22

Cosbi Jerwsalem

¹ Neges am ‛Ddyffryn y Weledigaeth‛: ^Ref

Beth sy'n digwydd yma?

Pam mae pawb wedi mynd i ben y toeau?

² Roeddet ti mor llawn bwrlwm –

yn ddinas mor swnllyd;

yn dre oedd yn llawn miri!

Nid cleddyf wnaeth ladd dy feirwon,

na'r frwydr chwaith.

³ Rhedodd dy arweinwyr.,

a dianc i le pell i ffwrdd;

cafodd pawb oedd ar ôl eu dal

heb help run bwasaethwr.

⁴ Dyna pam dw i'n dweud,

“Gadewch lonydd i mi,

gadewch i mi wylo'n chwerw!

Peidiwch boddran ceisio fy nghysuro

am fod fy mhobl druan wedi'u dinistrio.”

⁵ Ydy, mae fy Meistr, yr ARGLWYDD hollbwerus,

wedi trefnu diwrnod o banig, sathru, a dryswch –

yn Nyffryn y Weledigaeth mae sŵn waliau'n syrthio,

a phobl yn gweiddi ar y mynydd.

⁶ Mae Elam wedi codi'r gawell saethau,

gyda'i marchogion a'i cherbydau,

ac mae milwyr Cir wedi paratoi eu tarianau.

⁷ Mae dy ddyffrynnoedd, dy dir gorau,

yn llawn cerbydau,

a'r marchogion yn rhengoedd tu allan i'r giatiau.

⁸ Mae'r sgrîn oedd yn amddiffyn Jwda wedi'i symud.

Felly, bryd hynny, dyma chi'n mynd

i Blas y Goedwig ^Ref i nôl yr arfau.

⁹ Roeddech chi'n gweld fod llawer iawn o fylchau

yn waliau Dinas Dafydd.

Dyma gasglu dŵr o'r Llyn Isaf,

¹⁰ cyfri'r tai yn Jerwsalem a chwalu rhai

er mwyn gwneud waliau'r ddinas yn ddiogel.

¹¹ Yna adeiladu cronfa rhwng y ddwy wal

i ddal dŵr yr hen lyn.

Ond gymeroch chi ddim sylw o'r Un wnaeth y cwbl,

na meddwl am yr Un oedd wedi cynllunio hyn ers talwm.

¹² Bryd hynny dyma fy Meistr, yr ARGLWYDD hollbwerus,

yn galw ar bobl i wylo a galaru,

i siafio'r pen a gwisgo sachliain.

¹³ Ond yn lle hynny roedd hwyl a miri,

lladd gwartheg a defaid, bwyta cig ac yfed gwin.

“Gadewch i ni gael parti ac yfed,

falle byddwn ni'n marw fory!”

¹⁴ Rôn i wedi clywed yr ARGLWYDD hollbwerus yn dweud: “Fydd dim byd yn gwneud iawn am y pechod yma nes i chi farw.” Ie, dyna ddwedodd fy Meistr, yr ARGLWYDD hollbwerus.

Rhybudd i Shefna

¹⁵ Mae fy Meistr, yr ARGLWYDD hollbwerus yn dweud, “Dos i ofyn i'r swyddog – y Shefna yna sy'n gyfrifol am y palas:

¹⁶ ‘Beth sy'n digwydd yma?

Pwy roddodd ganiatâd i ti dorri bedd i ti dy hun yma?

Torri bedd i ti dy hun mewn lle pwysig;

naddu lle i ti dy hun gael gorffwys yn y graig!

¹⁷ Mae'r ARGLWYDD yn mynd i dy daflu di i ffwrdd –

dy hyrddio di'n bell, ti bwysigyn!

Bydd yn dy lapio di'n dynn,

¹⁸ yn dy rolio i fyny fel pelen

ac yn dy daflu i ffwrdd i wlad eang iawn!

A dyna ble byddi di'n marw.

Yr unig gerbydau crand i gario dy gorff

fydd y cywilydd ddaeth ar dŷ dy feistr!

¹⁹ Dw i'n mynd i dy ddiswyddo di!

Byddi di'n cael dy fwrw i lawr o dy safle!

²⁰ Bryd hynny bydda i'n galw ar fy ngwas Eliacim fab Chilceia, ²¹ ac yn ei arwisgo fe gyda dy grys di, a'r sash sydd am dy ganol. Bydda i'n rhoi dy awdurdod di iddo fe, a bydd e'n gofalu am bawb sy'n byw yn Jerwsalem a phobl Jwda i gyd. ²² Bydda i'n rhoi allwedd tŷ Dafydd iddo. Fydd neb yn gallu cau yr hyn mae'n ei agor, nac agor yr hyn mae e'n ei gau. ²³ Bydda i'n ei osod yn gadarn yn ei le – fel hoelen wedi'i tharo i wal. Bydd e'n cael y sedd anrhydedd yn nhŷ ei dad. ²⁴ Bydd y cyfrifoldeb am deulu ei dad arno fe: pawb, o'r egin a'r dail; bydd y llestri bach i gyd, y powlenni a'r gwahanol jariau yn hongian arno.’” ²⁵ “Bryd hynny,”—meddai'r ARGLWYDD hollbwerus—“bydd yr hoelen oedd mor sownd yn dod yn rhydd. Bydd yn cael ei thorri a bydd yn syrthio, a bydd y llwyth oedd yn hongian arni yn cael ei dynnu i lawr.” Mae'r ARGLWYDD wedi dweud!

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity