Eseia

ESEIA 32

Bydd cyfiawnder yn teyrnasu

¹ Edrychwch, bydd brenin yn teyrnasu yn gyfiawn,

a'i dywysogion yn rheoli yn deg.

² Bydd pob un ohonyn nhw fel cysgod rhag y gwynt

a lloches rhag y storm,

fel nentydd o ddŵr mewn tir sych

neu gysgod craig enfawr mewn crasdir.

³ Bydd llygaid y rhai sy'n gweld yn edrych,

a chlustiau'r rhai sy'n clywed yn gwrando.

⁴ Bydd y difeddwl yn oedi ac yn sylwi,

a thafod y rhai sydd ag atal dweud yn siarad yn glir.

⁵ Fydd y ffŵl ddim yn cael ei alw'n ŵr bonheddig,

na'r twyllwr yn cael ei anrhydeddu.

⁶ Achos dweud pethau ffôl mae ffŵl

a chynllunio i wneud pethau drwg.

Mae'n ymddwyn yn annuwiol

ac yn dweud celwydd am yr ARGLWYDD.

Mae'n gadael y newynog hefo stumog wag

ac yn gwrthod rhoi diod i'r sychedig.

⁷ Mae arfau'r twyllwr yn ddrwg.

Mae'n cynllunio i wneud drwg –

dinistrio pobl dlawd drwy eu twyllo

a cham-drin yr anghenus yn y llys.

⁸ Ond mae bwriadau'r person anrhydeddus yn dda,

ac mae bob amser yn gwneud beth sy'n nobl.

Cosbi gwragedd Jerwsalem

⁹ Chi wragedd cyfforddus, safwch!

Gwrandwch arna i!

Chi ferched heb bryder yn y byd,

gwrandwch beth dw i'n ddweud!

¹⁰ Mewn llai na blwyddyn,

cewch chi sydd mor hyderus eich ysgwyd.

Bydd y cynhaeaf grawnwin yn methu,

a dim ffrwyth i'w gasglu.

¹¹ Dylech chi sy'n gyfforddus ddechrau poeni!

Dylech chi sydd mor ddibryder ddechrau crynu!

Tynnwch eich dillad! Stripiwch!

Gwisgwch sachliain am eich canol,

¹² ac am y bronnau sy'n galaru!

Dros y caeau hyfryd a'r coed gwinwydd ffrwythlon,

¹³ dros dir fy mhobl bydd drain a mieri yn tyfu.

Ie, dros yr holl dai hyfryd a'r dre llawn miri.

¹⁴ Bydd y palas wedi'i adael a'r ddinas boblog yn wag.

Bydd y tyrau amddiffyn ar y bryniau

yn troi'n foelydd am byth –

yn gynefin i asynnod gwyllt a phorfa i breiddiau.

¹⁵ Dyna sut bydd hi, nes i ysbryd oddi uchod gael ei dywallt arnon ni,

i'r anialwch gael ei droi'n gaeau ffrwythlon,

a'r caeau droi'n goedwig.

¹⁶ Bryd hynny, bydd cyfiawnder yn aros yn yr anialwch

a thegwch yn cartrefu yn y caeau;

¹⁷ bydd cyfiawnder yn arwain i heddwch,

ac wedyn bydd llonydd a diogelwch am byth.

¹⁸ Bydd fy mhobl yn byw mewn cymunedau saff,

tai diogel, a lleoedd i orffwys yn dawel.

¹⁹ Er i'r goedwig gael ei thorri i lawr gan genllysg

ac i'r ddinas orwedd mewn cywilydd,

²⁰ y fath fendith fydd i chi sy'n hau wrth ffrydiau dŵr,

ac yn gollwng yr ych a'r asyn yn rhydd i bori.

I'r pen