Eseia

ESEIA 50

Pechod Israel ac ufudd-dod y gwas

“Ble mae'r dystysgrif ysgariad rois i i'ch mam

pan anfonais hi i ffwrdd?

I bwy oeddwn i mewn dyled

nes gorfod eich gwerthu chi iddyn nhw?

Cawsoch eich gwerthu am fod mor ddrwg;

cafodd eich mam ei hanfon i ffwrdd am eich bod wedi gwrthryfela.

² Pam oedd neb yna pan ddes i?

Pam wnaeth neb ateb pan oeddwn i'n galw?

Ydy fy llaw i'n rhy wan i ryddhau?

Ydw i'n rhy wan i achub?

Edrychwch! Fi wnaeth geryddu'r môr a'i sychu!

Galla i droi afonydd yn anialwch!

Roedd pysgod yn pydru am eu bod heb ddŵr,

wedi marw o syched!

³ Galla i wisgo'r awyr mewn du

a'i gorchuddio â sachliain.”

Y gwas yn dal ati

⁴ Rhoddodd fy Meistr, yr ARGLWYDD,

dafod i mi siarad ar ei ran;

dw i wedi dysgu sut i gysuro'r blinedig.

Bob bore mae'n fy neffro i ac yn fy nghael i wrando

fel mae disgybl yn gwrando ac yn dysgu.

⁵ Mae fy Meistr, yr ARGLWYDD, wedi fy nysgu i wrando,

a dw i ddim wedi gwrthryfela

na throi fy nghefn arno.

⁶ Rhoddais fy nghefn i'r rhai oedd yn fy chwipio,

a'm gên i'r rhai oedd yn tynnu'r farf.

Wnes i ddim cuddio fy wyneb

oddi wrth yr amarch a'r poeri.

⁷ Mae fy Meistr, yr ARGLWYDD, yn fy helpu –

felly dw i ddim yn derbyn yr amarch.

Dw i'n gwneud fy wyneb yn galed fel fflint,

a dw i'n gwybod na fydda i'n cywilyddio.

⁸ Mae'r un sy'n fy amddiffyn i wrth fy ymyl –

pwy sy'n meiddio ymladd yn fy erbyn?

Gadewch i ni wynebu'n gilydd!

pwy sydd am fy ngwrthwynebu i?

Gadewch iddo ddod ata i!

⁹ Mae fy Meistr, yr ARGLWYDD yn fy helpu i –

pwy sy'n mynd i'm cael yn euog o wneud drwg?

Edrychwch! Byddan nhw'n treulio fel dilledyn;

bydd gwyfyn yn eu difetha nhw.

¹⁰ Pwy ohonoch sy'n parchu'r ARGLWYDD?

Pwy sy'n gwrando ar lais ei was?

Dylai'r sawl sy'n cerdded mewn tywyllwch dudew,

heb olau ganddo o gwbl,

drystio'r ARGLWYDD

a phwyso ar ei Dduw.

¹¹ Ond chi sy'n cynnau'ch tân eich hunain

ac yn paratoi ffaglau –

cerddwch yng ngolau fflam eich tân

a'r ffaglau ydych wedi'u tanio!

Dyma fydd yn dod i chi o'm llaw i:

byddwch chi'n gorwedd i gael eich poenydio!

I'r pen