Eseia

ESEIA 62

Achub Jerwsalem

¹ “Er mwyn Seion dw i ddim yn mynd i dewi!

Er mwyn Jerwsalem dw i ddim yn mynd i orffwys,

nes bydd ei chyfiawnder yn disgleirio fel golau llachar

a'i hachubiaeth yn llosgi fel ffagl.”

² Bydd y gwledydd yn gweld dy gyfiawnder,

a'r holl frenhinoedd yn gweld dy ysblander;

a byddi di'n cael enw newydd

gan yr ARGLWYDD ei hun.

³ Byddi fel coron hardd yn llaw yr ARGLWYDD,

neu dwrban brenhinol yn llaw dy Dduw.

⁴ Gei di byth eto yr enw ‛Gwrthodedig‛,

a fydd dy wlad ddim yn cael ei galw yn ‛Anialwch‛.

Na, byddi'n cael dy alw ‛Fy hyfrydwch‛,

a bydd dy wlad yn cael yr enw ‛Fy mhriod‛.

Achos bydd yr ARGLWYDD wrth ei fodd gyda ti,

a bydd dy wlad fel gwraig ffrwythlon iddo.

⁵ Fel mae bachgen yn priodi merch ifanc,

bydd dy blant yn dy briodi di;

ac fel mae priodfab wrth ei fodd gyda'i wraig,

bydd dy Dduw wrth ei fodd gyda ti.

⁶ Dw i'n gosod gwylwyr ar dy waliau di, O Jerwsalem.

Fyddan nhw ddim yn dawel nos na dydd!

Chi sy'n gweddïo ar yr ARGLWYDD, peidiwch tewi;

⁷ peidiwch rhoi llonydd iddo nes iddo adfer Jerwsalem,

a'i gwneud yn destun mawl drwy'r byd.

⁸ Mae'r ARGLWYDD wedi tyngu llw i'w gryfder:

“Dw i ddim yn mynd i roi dy ŷd

yn fwyd i dy elynion byth eto!

A fydd plant estroniaid ddim yn yfed y gwin

wnest ti weithio mor galed amdano.

⁹ Bydd y rhai sy'n medi'r cynhaeaf yn ei fwyta

ac yn moli'r ARGLWYDD.

A bydd y rhai sy'n casglu'r grawnwin

yn yfed y sudd yn fy nghysegr sanctaidd.”

¹⁰ Dewch i mewn! Dewch i mewn drwy'r giatiau!

Cliriwch y ffordd i'r bobl ddod!

Adeiladwch! Adeiladwch briffordd!

Symudwch bob carreg sy'n rhwystr!

Codwch faner dros y bobloedd!^Croes

¹¹ Mae'r ARGLWYDD wedi cyhoeddi hyn

drwy'r byd i gyd:

“Dwedwch wrth Seion annwyl,

‘Edrych! Mae dy Achubwr yn dod!

Edrych! Mae ei wobr ganddo;

mae'n dod â'i roddion o'i flaen.’”

¹² Byddan nhw'n cael eu galw, “Y Bobl Sanctaidd.

Pobl Rydd yr ARGLWYDD.”

A byddi di, Jerwsalem, yn cael dy alw,

“Yr un gafodd ei cheisio,”

“Dinas heb ei gwrthod”.

I'r pen