Eseia

Hafan

Hen Destament

Testament Newydd

ESEIA 7

Eseia'n cynnig gobaith i'r Brenin Ahas

¹ Yn y cyfnod pan oedd Ahas (mab Jotham ac ŵyr i Wseia) yn frenin ar Jwda, dyma Resin (brenin Syria) a Pecach fab Remaleia (brenin Israel) yn ymosod ar Jerwsalem; ond wnaethon nhw ddim llwyddo i'w gorchfygu hi.^Croes

² Pan ddaeth y newyddion i balas brenhinol Dafydd fod Syria ac Effraim ^Ref mewn cynghrair, roedd y brenin a'r bobl wedi cynhyrfu. Roedden nhw fel coed yn y goedwig yn ysgwyd o flaen y gwynt. ³ Felly dwedodd yr ARGLWYDD wrth Eseia, “Dos hefo dy fab Shear-iashŵf ^Ref i gyfarfod ag Ahas wrth derfyn y sianel ddŵr sy'n dod o'r gronfa uchaf, ar ffordd Maes y Golchwr. ⁴ Dwed wrtho: ‘Paid panicio. Paid bod ag ofn. Does dim rhaid torri dy galon am fod Resin a'r Syriaid a mab Remaleia wedi gwylltio – dau stwmp ydyn nhw; dim mwy na ffaglau myglyd!’ ⁵ Mae'r Syriaid – hefo Effraim a mab Remaleia – wedi cynllwynio yn dy erbyn di, a dweud, ⁶ ‘Gadewch i ni ymosod ar Jwda, codi ofn arni a'i gorchfygu. Yna gallwn osod mab Tafél yn frenin arni.’

⁷ “Ond dyma mae'r Meistr, yr ARGLWYDD, yn ei ddweud:

Fydd y cynllun ddim yn llwyddo,

Fydd y peth ddim yn digwydd.

^8-9 Damascus ydy prifddinas Syria,

a Resin ydy pennaeth Damascus.

Samaria ydy prifddinas Effraim,

a Remaleia ydy pennaeth Samaria.

Mewn llai na chwe deg pum mlynedd

bydd Effraim wedi chwalu a pheidio â bod yn bobl.

Os na wnewch chi gredu,

wnewch chi'n sicr ddim sefyll.”

¹⁰ Dyma'r ARGLWYDD yn siarad gydag Ahas eto: ¹¹ “Gofyn i'r ARGLWYDD dy Dduw roi arwydd i ti – unrhyw beth, does dim ffiniau.” ¹² Ond dyma Ahas yn ateb, “Na wna i, dw i ddim am roi'r ARGLWYDD ar brawf.” ¹³ Yna dwedodd Eseia, “Gwrandwch, balas Dafydd. Ydy e ddim yn ddigon eich bod chi'n trethu amynedd pobl heb orfod trethu amynedd fy Nuw hefyd? ¹⁴ Felly, mae'r Meistr ei hun yn mynd i roi arwydd i chi! Edrychwch, bydd y ferch ifanc yn feichiog, ac yn cael mab – a bydd y plentyn yn cael ei alw yn Emaniwel. ^Ref ^Croes ¹⁵ Cyn iddo ddod i wybod y gwahaniaeth rhwng drwg a da, bydd yn bwyta caws colfran a mêl. ¹⁶ Cyn iddo allu gwrthod y drwg a dewis y da, bydd tir y ddau frenin rwyt ti'n eu hofni wedi'i adael yn wag. ¹⁷ Bydd yr ARGLWYDD yn gwneud i ti a dy bobl a phalas dy dad fynd drwy gyfnod na fu ei debyg ers i Effraim ^Ref wrthryfela yn erbyn Jwda – bydd yn dod â brenin Asyria yma.” ¹⁸ Bryd hynny,

bydd yr ARGLWYDD yn chwibanu ar y gwybed

sydd yn afonydd pell yr Aifft

a'r gwenyn sydd yng ngwlad Asyria.

¹⁹ Byddan nhw'n dod ac yn glanio

yn y cymoedd cul, serth

a'r hafnau sydd yn y creigiau,

yn y llwyni drain

a'r lleoedd i ddyfrio anifeiliaid.

²⁰ Bryd hynny,

bydd y Meistr yn defnyddio'r rasel

mae wedi'i llogi yr ochr draw i afon Ewffrates

(sef brenin Asyria)

i siafio'r pen a'r blew ar y rhannau preifat;

a bydd yn siafio'r farf hefyd.

²¹ Bryd hynny,

bydd dyn yn cadw heffer a dwy afr.

²² Byddan nhw'n rhoi digon o laeth

iddo fwyta caws colfran.

Caws colfran a mêl fydd bwyd

pawb sydd ar ôl yn y wlad.

²³ Bryd hynny,

bydd pobman lle roedd mil o goed gwinwydd

(oedd yn werth mil o ddarnau arian)

yn anialwch o ddrain a mieri.

²⁴ Dim ond gyda bwa saeth fydd dynion yn mynd yno,

am fod y tir i gyd yn anialwch o ddrain a mieri.

²⁵ Fydd neb yn mynd i'r bryniau

i drin y tir gyda chaib

am fod cymaint o ddrain a mieri.

Yn lle hynny bydd yn dir agored

i wartheg a defaid bori arno.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity