Eseia

Hafan

Hen Destament

Testament Newydd

ESEIA 8

Rhybudd a gobaith

¹ Yna dwedodd yr ARGLWYDD wrtho i, “Dos i nôl hysbysfwrdd mawr ac ysgrifenna arno'n glir ‘I Maher-shalal-has-bas’.” ^Ref ² Dyma fi'n cymryd dau dyst gyda mi, dynion y gallwn i ddibynnu arnyn nhw, sef Wreia yr offeiriad a Sechareia fab Ieberecheia. ³ Wedyn dyma fi'n gorwedd gyda'm gwraig a dyma hi'n beichiogi. Bachgen gafodd hi, a dyma'r ARGLWYDD yn dweud wrtho i, “Galw fe'n Maher-shalal-has-bas, ⁴ achos cyn i'r bachgen allu dweud ‘dad’ neu ‘mam’, bydd brenin Asyria wedi cymryd cyfoeth Damascus a Samaria i gyd.”

Mae Asyria'n dod

⁵ A dyma'r ARGLWYDD yn siarad gyda mi eto:

⁶ “Mae'r bobl yma wedi gwrthod dŵr Siloa, ^Ref

sy'n llifo'n dawel,

ac wedi plesio Resin a mab Remaleia.

⁷ Felly, bydd y Meistr yn gwneud i holl ddŵr cryf

yr Ewffrates lifo drostyn nhw –

sef brenin Asyria a'i fyddin.

Bydd fel afon yn torri allan o'i sianelau,

ac yn gorlifo'i glannau.

⁸ Bydd yn rhedeg drwy Jwda fel llifogydd

ac yn codi at y gwddf.

Mae ei adenydd wedi'u lledu

dros dy dir i gyd, Emaniwel!”

⁹ Casglwch i ryfel, chi bobloedd – ond cewch eich dryllio!

Gwrandwch, chi sydd ym mhen draw'r byd:

paratowch i ryfela – ond cewch eich dryllio;

paratowch i ryfela – ond cewch eich dryllio!

¹⁰ Cynlluniwch strategaeth – ond bydd yn methu!

Cytunwch beth i'w wneud – ond fydd e ddim yn llwyddo.

Achos mae Duw gyda ni!

Yr ARGLWYDD yn annog Eseia

¹¹ Dyma ddwedodd yr ARGLWYDD wrtho i – fel petai'n gafael ynof fi a'm rhybuddio i beidio mynd yr un ffordd â'r bobl yma:

¹² “Peidiwch dweud, ‘Cynllwyn ydy e!’

bob tro mae'r bobl yma'n dweud fod cynllwyn!

Does dim rhaid dychryn na bod ag ofn

beth maen nhw'n ei ofni.

¹³ Yr ARGLWYDD hollbwerus ydy'r un i'w barchu!

Fe ydy'r unig un i'w ofni,

a dychryn rhagddo!

¹⁴ Bydd e'n gysegr –

ond i ddau deulu brenhinol Israel

bydd yn garreg sy'n baglu pobl

a chraig sy'n gwneud iddyn nhw syrthio.

Bydd fel trap neu fagl

i'r rhai sy'n byw yn Jerwsalem.

¹⁵ Bydd llawer yn baglu,

yn syrthio ac yn cael eu dryllio;

ac eraill yn cael eu rhwymo a'u dal.”

Tystiolaeth Eseia

¹⁶ Bydd y rhybudd yma'n cael ei rwymo, a'r ddysgeidiaeth yn cael ei selio a'i chadw gan fy nisgyblion i. ¹⁷ Dw i'n mynd i ddisgwyl am yr ARGLWYDD, er ei fod e wedi troi cefn ar bobl Jacob – dw i'n ei drystio fe! ¹⁸ Dyma fi, a'r plant mae'r ARGLWYDD wedi'u rhoi i mi. Maen nhw'n arwyddion ac yn rhybudd i Israel oddi wrth yr ARGLWYDD hollbwerus, sy'n byw ar Fynydd Seion.

¹⁹ Bydd pobl yn dweud wrthoch chi,

“Ewch i holi'r swynwyr a'r dewiniaid

sy'n sgrechian a griddfan.

Oni ddylai pobl geisio'u ‛duwiau‛ –

holi'r meirw ar ran y byw?”

²⁰ “At y gyfraith a'r dystiolaeth!

Os nad ydyn nhw'n siarad yn gyson â'r neges yma,

maen nhw yn y tywyllwch.”

²¹ Maen nhw'n cerdded o gwmpas

mewn eisiau a newyn.

Am eu bod yn llwgu byddan nhw'n gwylltio

ac yn melltithio'u brenin a'u ‛duwiau‛,

wrth edrych i fyny.

²² Wrth edrych ar y tir

does dim i'w weld ond trwbwl a thywyllwch,

düwch a gwewyr meddwl –

bydd wedi'i daflu i dywyllwch dudew.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity