Jeremeia

Hafan

Hen Destament

Testament Newydd

JEREMEIA 15

Bydd pobl Jwda'n cael eu cosbi

¹ Yna dyma'r ARGLWYDD yn dweud hyn wrtho i: “Hyd yn oed petai Moses a Samuel yn dod i bledio dros y bobl yma, fyddwn i ddim yn eu helpu nhw. Dos â nhw o ngolwg i! Anfon nhw i ffwrdd! ² Ac os byddan nhw'n gofyn, ‘Ble awn ni?’, dywed wrthyn nhw: ‘Dyma mae'r ARGLWYDD yn ei ddweud:

“Bydd y rhai sydd i farw o haint yn marw o haint.

Bydd y rhai sydd i farw yn y rhyfel yn marw yn y rhyfel.

Bydd y rhai sydd i farw o newyn yn marw o newyn.

Bydd y rhai sydd i gael eu cymryd yn gaethion yn cael eu cymryd yn gaethion.”’

³ Bydd pedwar peth ofnadwy yn digwydd iddyn nhw,” meddai'r ARGLWYDD: “Bydd y cleddyf yn eu lladd. Bydd cŵn yn llusgo'r cyrff i ffwrdd. Bydd adar yn eu bwyta a'r anifeiliaid gwyllt yn gorffen beth sydd ar ôl. ⁴ Bydd beth fydd yn digwydd iddyn nhw yn dychryn pobl y gwledydd i gyd. Dyna'r gosb am beth wnaeth Manasse fab Heseceia, brenin Jwda, yn Jerwsalem.”^Croes

Yr ARGLWYDD

⁵ “Pwy sy'n mynd i deimlo trueni drosot ti, Jerwsalem?

Fydd unrhyw un yn cydymdeimlo hefo ti?

Fydd unrhyw un yn stopio i holi sut wyt ti?

⁶ Ti wedi troi cefn arna i,” meddai'r ARGLWYDD.

“Rwyt ti wedi mynd o ddrwg i waeth!

Felly dw i'n mynd i dy daro di a dy ddinistrio di.

Dw i wedi blino rhoi cyfle arall i ti o hyd.

⁷ Dw i'n mynd i wahanu'r us a'r grawn

ym mhob un o drefi'r wlad.

Dw i'n mynd i ddinistrio fy mhobl, a mynd â'u plant i ffwrdd,

am eu bod nhw wedi gwrthod newid eu ffyrdd.

⁸ Bydd mwy o weddwon nag o dywod ar lan y môr.

Bydda i'n lladd dy filwyr ifanc ganol dydd,

a chwalu bywydau eu mamau.

Bydd dioddef a dychryn

yn dod drostyn nhw'n sydyn.

⁹ Bydd y fam oedd â saith o feibion

yn anadlu'n drwm mewn panig, ac yn llewygu.

Mae'r haul oedd yn disgleirio yn ei bywyd

wedi machlud ganol dydd.

Mae hi'n eistedd mewn cywilydd a gwarth.

A bydd y rhai sydd ar ôl yn cael eu lladd

gan gleddyf y gelyn,”

—yr ARGLWYDD sy'n dweud hyn.

Anobaith Jeremeia

¹⁰ “O, mam! Dw i'n sori fy mod i wedi cael fy ngeni!^Croes Ble bynnag dw i'n mynd dw i'n dadlau a thynnu'n groes i bobl! Dw i ddim wedi benthyg arian i neb na benthyg arian gan neb. Ond mae pawb yn fy rhegi i!” ¹¹ A dyma'r ARGLWYDD yn ateb: “Onid ydw i wedi dy wneud di'n gryf am reswm da? Bydda i'n gwneud i dy elynion bledio am dy help di pan fyddan nhw mewn trafferthion. ^Ref

¹² “Oes rhywun yn gallu torri haearn, haearn o'r gogledd gyda phres ynddo?”

Yr ARGLWYDD

¹³ “Am eich bod wedi pechu drwy'r wlad,

bydda i'n rhoi eich cyfoeth a'ch trysorau

yn ysbail i'ch gelynion.

¹⁴ Byddwch yn gwasanaethu eich gelynion

mewn gwlad ddieithr.

Mae fy llid yn llosgi fel tân fydd ddim yn diffodd.”

Jeremeia

¹⁵ “ ARGLWYDD, ti'n gwybod beth sy'n digwydd.

Cofia amdana i, a thyrd i'm helpu i.

Tyrd i dalu'n ôl i'r bobl hynny sy'n fy erlid i.

Paid bod mor amyneddgar nes gadael iddyn nhw fy lladd i.

Dw i'n diodde'r gwawdio er dy fwyn di.

¹⁶ Wrth i ti siarad rôn i'n llyncu pob gair;

roedd dy eiriau'n fy ngwneud i mor hapus –

rôn i wrth fy modd!

I ti dw i'n perthyn,

O ARGLWYDD, y Duw hollbwerus.

¹⁷ Wnes i ddim ymuno hefo pawb arall

yn chwerthin a joio.

Na, roeddwn i'n cadw ar wahân

am fod dy law di arna i.

Rôn i wedi gwylltio hefo nhw.

¹⁸ Felly, pam dw i'n dal i ddioddef?

Pam dw i'n gorfod goddef hyn i gyd –

fel petawn i wedi fy anafu, a'r briw yn gwrthod gwella?

Wyt ti'n mynd i'm siomi fel nant sydd wedi sychu, –

ffos â'i dŵr wedi diflannu?”

¹⁹ A dyma ateb yr ARGLWYDD:

Yr ARGLWYDD

“Rhaid i ti stopio siarad fel yna!

Gwna i dy gymryd di'n ôl wedyn,

a cei ddal ati i'm gwasanaethu i.

Dywed bethau gwerth eu dweud yn lle siarad rwtsh,

wedyn cei ddal ati i siarad ar fy rhan i.

Ti sydd i ddylanwadu arnyn nhw,

nid nhw'n dylanwadu arnat ti!

²⁰ Dw i'n mynd i dy wneud di yn gryf fel wal bres.^Croes

Byddan nhw'n ymosod arnat ti

ond yn methu dy drechu di.

Bydda i'n edrych ar dy ôl di

ac yn dy achub di.”

—yr ARGLWYDD sy'n dweud hyn.

²¹ “Bydda i'n dy achub di o afael y bobl ddrwg yma,

ac yn dy ryddhau o grafangau pobl greulon,”

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity