Jeremeia

Hafan

Hen Destament

Testament Newydd

JEREMEIA 18

Y crochenydd a'r clai

¹ Dyma'r ARGLWYDD yn rhoi neges arall i Jeremeia: ² “Dos i lawr i weithdy'r crochenydd, a bydda i'n siarad gyda ti yno.” ³ Felly dyma fi'n mynd i lawr i'r crochendy, a dyna lle roedd y crochenydd yn gweithio ar y droell. ⁴ Pan oedd rhywbeth o'i le ar y potyn roedd yn ei wneud o'r clai, byddai'n dechrau eto, ac yn gwneud rhywbeth oedd yn edrych yn iawn.

⁵ A dyma'r ARGLWYDD yn rhoi neges i mi: ⁶ “Ydw i ddim yn gallu gwneud yr un peth i ti, wlad Israel? Rwyt ti yn fy nwylo i fel mae'r clai yn nwylo'r crochenydd.^Croes ⁷ Galla i ddweud un funud fy mod i'n mynd i chwynnu a chwalu a dinistrio gwlad arbennig. ⁸ Ond os ydy pobl y wlad dw i'n ei bygwth yn stopio gwneud drwg, fydda i ddim yn ei dinistrio hi fel roeddwn i wedi dweud. ⁹ Dro arall bydda i'n addo adeiladu gwlad neu deyrnas arbennig a'i gwneud hi'n sefydlog. ¹⁰ Ond os ydy pobl y wlad honno'n gwneud drwg ac yn gwrthod gwrando arna i, fydda i ddim yn gwneud y pethau da wnes i addo iddi.

¹¹ “Felly dywed wrth bobl Jwda a'r rhai sy'n byw yn Jerwsalem fod yr ARGLWYDD yn dweud: ‘Dw i'n paratoi i wneud drwg i chi, ac yn bwriadu eich cosbi chi. Felly rhaid i bob un ohonoch newid eich ffyrdd a stopio gwneud y pethau drwg dych chi'n eu gwneud.’

¹² “Ond byddan nhw'n dweud, ‘Does dim pwynt. Dŷn ni'n mynd i ddal ati i wneud beth dŷn ni eisiau.’”

Y bobl yn gwrthod yr ARGLWYDD

¹³ Felly dyma mae'r ARGLWYDD yn ei ddweud:

“Gofyn i bobl y gwledydd eraill

os ydyn nhw wedi clywed am y fath beth!

Mae Jerwsalem, dinas lân Israel,

wedi gwneud peth cwbl ffiaidd!

¹⁴ Ydy'r eira'n diflannu oddi ar lethrau creigiog Libanus?

Ydy nentydd oer y mynyddoedd pell yn stopio llifo? Nac ydyn.

¹⁵ Ond mae fy mhobl wedi fy anghofio i.

Maen nhw'n llosgi arogldarth i eilun-dduwiau diwerth!

Gwnaeth hynny iddyn nhw faglu a gadael yr hen ffyrdd

a mynd ar goll ar lwybrau diarffordd.

¹⁶ O ganlyniad, bydd pethau ofnadwy yn digwydd i'r wlad.

Fydd pobl ddim yn stopio chwibanu mewn rhyfeddod.

Bydd pawb sy'n pasio heibio yn dychryn

ac yn ysgwyd eu pennau'n syn.

¹⁷ Dw i'n mynd i wneud i'w gelynion eu gyrru nhw ar chwâl,

fel tywod yn cael ei yrru gan wynt y dwyrain.

Bydda i'n troi cefn arnyn nhw

yn lle troi i'w helpu nhw pan ddaw'r drychineb.”

Cynllwyn i ymosod ar Jeremeia

¹⁸ A dyma'r bobl yn dweud, “Dewch, gadewch i ni ddelio hefo Jeremeia. Bydd offeiriaid yn dal ar gael i roi arweiniad i ni, dynion doeth i roi cyngor i ni, a phroffwydi i roi neges Duw i ni. Dewch, gadewch i ni ddod â cyhuddiadau yn ei erbyn. Fydd dim rhaid i ni wrando arno fe o gwbl wedyn.”

Jeremeia:

¹⁹ “ ARGLWYDD, wnei di ymateb, plîs?

Gwranda beth mae fy ngelynion yn ei ddweud.

²⁰ Ydy'n iawn i dalu drwg am dda?

Maen nhw wedi cloddio twll i mi.

Wyt ti ddim yn cofio fel roeddwn i'n

pledio ar eu rhan nhw o dy flaen di?

Rôn i'n ceisio dy stopio di rhag bod yn ddig hefo nhw.

²¹ Felly gad i'w plant nhw lwgu!

Gad iddyn nhw farw yn y rhyfel!

Gwna eu gwragedd yn weddwon heb blant.

Gad i'r dynion hŷn gael eu lladd gan heintiau,

a'r bechgyn ifanc wrth ymladd yn y rhyfel.

²² Gad i sŵn sgrechian gael ei glywed yn y tai

wrth i gangiau o filwyr ymosod arnyn nhw'n ddirybudd.

Maen nhw wedi cloddio twll i mi

a gosod trapiau i geisio fy nal.

²³ ARGLWYDD, rwyt ti'n gwybod

eu bod nhw'n bwriadu fy lladd i.

Paid maddau iddyn nhw eto.

Paid cuddio'u pechodau nhw o dy olwg.

Gad iddyn nhw faglu o dy flaen.

Delia gyda nhw yn dy lid.”

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity