Yn ôl

Jeremeia

Llyfrau

Hafan

Hen Destament

Testament Newydd

JEREMEIA 48

Neges am Moab

¹ Dyma mae'r ARGLWYDD hollbwerus, Duw Israel, yn ei ddweud am Moab:

“Mae hi ar ben ar dref Nebo! Bydd hi'n cael ei dinistrio.

Bydd Ciriathaim yn cael ei chywilyddio a'i choncro –

bydd y gaer yn cael ei chywilyddio a'i bwrw i lawr.

² Fydd Moab ddim yn cael ei hedmygu eto!

Bu cynllwynio yn Cheshbon i'w dinistrio:

‘Dewch! Gadewch i ni roi diwedd ar y wlad!’

Tref Madmen, cei dithau dy dawelu –

does dim dianc rhag y rhyfel i fod.

³ Gwrandwch ar y gweiddi yn Choronaïm!

‘Dinistr llwyr! Mae'n adfeilion!’

⁴ Mae Moab wedi'i dryllio!

Bydd ei phlant yn gweiddi allan.

⁵ Byddan nhw'n dringo llethrau Lwchith

ac yn wylo'n chwerw wrth fynd.

Ar y ffordd i lawr i Choronaïm

bydd sŵn pobl yn gweiddi mewn dychryn.

⁶ ‘Ffowch am eich bywydau!

Byddwch fel prysglwyn unig yn yr anialwch.’

⁷ Am dy fod wedi trystio dy ymdrechion a dy gyfoeth dy hun,

byddi di hefyd yn cael dy goncro.

Bydd dy dduw Chemosh yn cael ei gymryd i ffwrdd,

a'i offeiriaid a'i swyddogion gydag e.

⁸ Mae'r gelyn sy'n dinistrio yn dod i daro'r trefi i gyd;

fydd dim un yn dianc.

Bydd trefi'r dyffryn yn cael eu dinistrio,

a'r trefi ar y byrdd-dir uchel hefyd.

Dw i, yr ARGLWYDD, wedi dweud.

⁹ Cod garreg fedd i Moab,

achos bydd yn cael ei throi'n adfeilion.

Bydd ei threfi'n cael eu dinistrio

a fydd neb yn byw ynddyn nhw.”

¹⁰ (Melltith ar unrhyw un sy'n ddiog wrth wneud gwaith yr ARGLWYDD! Melltith ar unrhyw un sydd ddim yn defnyddio'i gleddyf i dywallt gwaed!)

Bydd yr ARGLWYDD yn dinistrio Moab

¹¹ “Mae Moab wedi teimlo'n saff o'r dechrau cyntaf.

Mae hi wedi cael llonydd, fel gwin wedi hen setlo

a heb gael ei dywallt o un jar i'r llall.

Dydy hi erioed wedi cael ei chymryd yn gaeth;

mae fel gwin sydd wedi cadw ei flas a'i arogl.

¹² “Ond mae'r amser yn dod pan fydda i'n anfon dynion i'w selar i'w thywallt allan a malu'r jariau'n ddarnau,” meddai'r ARGLWYDD. ¹³ “Bydd gan Moab gywilydd o'i heilun-dduw Chemosh, fel roedd gan Israel gywilydd o'r llo roedd yn ei drystio yn Bethel.^Croes

¹⁴ Mae dynion Moab yn brolio,

‘Dŷn ni'n arwyr!

Dŷn ni'n filwyr cryf!’

¹⁵ Ond mae'r un sy'n dinistrio Moab yn dod.

Bydd ei threfi'n cael eu concro,

a'i milwyr ifanc gorau'n cael eu lladd,”

—y Brenin, sef yr ARGLWYDD hollbwerus, sy'n dweud hyn.

¹⁶ “Mae dinistr Moab ar fin digwydd;

mae'r drwg ddaw arni'n dod yn fuan.

¹⁷ Galarwch drosti, chi wledydd sydd o'i chwmpas

a phawb sy'n gwybod amdani.

Dwedwch, ‘O! Mae ei grym wedi'i golli;

mae'r deyrnwialen hardd wedi'i thorri!’

¹⁸ Dewch i lawr o'ch safle balch ac eistedd yn y baw,

chi sy'n byw yn Dibon. ^Ref

Bydd yr un fydd yn dinistrio Moab yn ymosod

ac yn dymchwel y caerau sy'n eich amddiffyn.

¹⁹ Chi sy'n byw yn Aroer, ^Ref

safwch ar ochr y ffordd yn gwylio.

Gofynnwch i'r dynion a'r merched sy'n dianc,

‘Beth sydd wedi digwydd?’

²⁰ Byddan nhw'n ateb:

‘Mae Moab wedi'i chywilyddio

– mae wedi'i choncro.’

Udwch a chrio!

Cyhoeddwch ar lan afon Arnon

‘Mae Moab wedi'i dinistrio.’”

²¹ Mae trefi'r byrdd-dir i gael eu barnu – Cholon, Iahats, Meffaäth, ²² Dibon, Nebo, Beth-diblathaîm, ²³ Ciriathaim, Beth-gamwl, Beth-meon, ²⁴ Cerioth a Bosra. Bydd trefi Moab i gyd yn cael eu cosbi – pell ac agos. ²⁵ “Mae corn Moab wedi'i dorri, a'i nerth wedi dod i ben,” meddai'r ARGLWYDD.

²⁶ Roedd Moab yn brolio ei bod yn well na'r ARGLWYDD. Ond bydd fel meddwyn yn rholio yn ei chwŷd. Bydd pawb yn chwerthin ar ei phen! ²⁷ Onid chi, bobl Moab, oedd yn chwerthin ar ben Israel? Roeddech yn ei thrin fel petai'n lleidr, ac yn ysgwyd eich pennau bob tro roedd rhywun yn sôn amdani.

²⁸ Bobl Moab, gadewch eich trefi

a mynd i fyw yn y creigiau,

fel colomennod yn nythu

ar y clogwyni uwchben y ceunant.

²⁹ Dŷn ni wedi clywed am falchder Moab –

mae ei phobl mor falch:

yn hunandybus, yn brolio, yn snobyddlyd,

ac mor llawn ohoni ei hun!^Croes

³⁰ “Dw innau'n gwybod mor filain ydy hi,”

—yr ARGLWYDD sy'n dweud hyn.

“Mae ei brolio hi'n wag ac yn cyflawni dim byd!

³¹ Felly, bydda i'n udo dros bobl Moab.

Bydda i'n crio dros Moab gyfan,

ac yn griddfan dros bobl Cir-cheres. ^Ref

³² Bydda i'n wylo dros winwydden Sibma

mwy na mae tref Iaser yn wylo drosti.

Roedd ei changhennau'n ymestyn i'r Môr Marw ar un adeg;

roedden nhw'n cyrraedd mor bell â Iaser.

Ond mae'r gelyn sy'n dinistrio'n mynd i ddifetha

ei chnydau o ffigys a grawnwin.

³³ Bydd pleser a llawenydd yn diflannu'n llwyr

o dir ffrwythlon Moab.

Bydda i'n stopio'r gwin rhag llifo i'r cafnau;

fydd neb yn gweiddi'n llawen wrth sathru'r grawnwin –

bydd gweiddi, ond bydd y gweiddi'n wahanol.

³⁴ “Bydd y gweiddi a'r galar yn Cheshbon i'w clywed yn Elealê a hyd yn oed Iahats. Bydd y sŵn i'w glywed o Soar i Choronaïm ac Eglath-shalisheia. Bydd hyd yn oed dŵr Nimrim yn cael ei sychu. ³⁵ Fydd neb yn mynd i fyny i aberthu ar yr allorau paganaidd ac yn llosgi arogldarth i dduwiau Moab,” meddai'r ARGLWYDD. ³⁶ “Felly bydd fy nghalon yn griddfan fel pibau dros Moab. Pibau chwyth yn canu cân i alaru dros bobl Cir-cheres. Bydd y cyfoeth wnaethon nhw ei gasglu'n diflannu.

³⁷ “Bydd pawb wedi siafio'r pen a'r farf. Bydd pawb wedi torri eu dwylo â chyllyll, ac yn gwisgo sachliain. ³⁸ Fydd dim byd ond galaru i'w glywed ar bennau'r tai ac yn y sgwariau. Dw i'n mynd i dorri Moab fel potyn pridd does neb ei eisiau,” meddai'r ARGLWYDD. ³⁹ “Bydd wedi'i dorri'n deilchion! Bydd y bobl yn udo! Bydd Moab yn troi ei chefn mewn cywilydd! Bydd yn destun sbort ac yn olygfa ddychrynllyd i'r gwledydd o'i chwmpas.”

Dim dianc i Moab

⁴⁰ Ie, dyma mae'r ARGLWYDD yn ei ddweud:

“Edrychwch! Bydd y gelyn fel eryr

yn lledu ei adenydd ac yn plymio i lawr ar Moab.

⁴¹ Bydd ei threfi'n cael eu meddiannu,

a'r caerau sy'n ei hamddiffyn yn cael eu dal.

Y diwrnod hwnnw bydd milwyr Moab wedi dychryn

fel gwraig ar fin cael babi!

⁴² Bydd Moab yn cael ei dinistrio ac yn peidio â bod yn genedl,

am ei bod hi wedi brolio ei bod yn well na'r ARGLWYDD.

⁴³ Panig, pydew a thrap sydd o'ch blaenau chi, bobl Moab!

—yr ARGLWYDD sy'n dweud hyn.

⁴⁴ Bydd pawb sy'n ffoi mewn dychryn yn disgyn i dwll.

A bydd pawb sy'n dringo o'r twll yn cael eu dal mewn trap!^Croes

Mae'r amser wedi dod i mi gosbi Moab,

—yr ARGLWYDD sy'n dweud hyn.

⁴⁵ Bydd ffoaduriaid yn sefyll wedi ymlâdd

dan gysgod waliau Cheshbon.

Mae tân wedi lledu o Cheshbon,

fflamau o diriogaeth y Brenin Sihon.

Mae'n llosgi ar hyd ffiniau Moab

i ben y mynyddoedd yng ngwlad y bobl ryfelgar.

⁴⁶ Mae hi ar ben arnat ti, Moab!

Dych chi, bobl sy'n addoli Chemosh, wedi'ch difa.

Mae eich meibion yn garcharorion,

a'ch merched wedi'u cymryd yn gaethion.

⁴⁷ Ond yn y dyfodol,

bydda i'n rhoi'r cwbl gollodd Moab yn ôl iddi.”

—yr ARGLWYDD sy'n dweud hyn.

Dyma ddiwedd y neges o farn ar Moab.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity