Micha

MICHA 2

Bydd Duw yn cosbi'r rhai sy'n sathru'r tlawd

¹ Gwae nhw, y rhai sy'n dyfeisio drygioni

a gorweddian ar eu gwlâu yn cynllwynio.^Croes

Wedyn codi gyda'r wawr i wneud y drwg –

maen nhw'n gwneud beth maen nhw eisiau.

² Maen nhw'n cymryd y tir maen nhw'i eisiau,

ac yn dwyn eu tai oddi ar bobl.

Maen nhw'n cipio cartrefi drwy dwyll a thrais

ac yn dwyn etifeddiaeth pobl eraill.

“Dw i'n cynllunio i ddod â dinistr ar y criw pobl yma.

Fydd dim modd i chi ddianc!

Dim mwy o swancio i chi! –

mae pethau'n mynd i fod yn ddrwg!

⁴ Bryd hynny, bydd pobl yn gwneud hwyl am eich pen chi

drwy ganu galarnad i chi'n sbeitlyd –

‘Mae ar ben arnon ni!

Mae ein tir yn cael ei werthu!

Mae Duw wedi cymryd y cwbl,

a rhoi'n tir i fradwyr!’”

⁵ Felly fydd neb yn mesur y tir eto

i chi gael siâr ohono

gyda phobl yr ARGLWYDD.

⁶ “Stopia falu awyr!” medden nhw'n lloerig.

“Ddylai neb siarad fel yna!

Fyddwn ni ddim yn cael ein cywilyddio.”

⁷ Ai fel hyn mae pobl Jacob yn meddwl? –

“Dydy'r ARGLWYDD ddim yn colli ei dymer.

Fyddai e byth yn gwneud y fath beth!”

“Mae'r pethau da dw i'n eu haddo yn digwydd

i'r rhai sy'n byw yn iawn.

⁸ Ond yn ddiweddar mae fy mhobl

wedi codi yn fy erbyn fel gelyn.

Dych chi'n dwyn y gôt a'r crys

oddi ar bobl ddiniwed sy'n pasio heibio

fel milwyr yn dod adre o ryfel.

⁹ Dych chi'n gyrru gweddwon o'u cartrefi clyd,

a dwyn eu heiddo ^Ref oddi ar eu plant am byth.

¹⁰ Felly symudwch! I ffwrdd â chi!

Does dim lle i chi orffwys yma!

Dych chi wedi llygru'r lle,

ac wedi'i ddifetha'n llwyr!

¹¹ Petai rhywun yn dod heibio

yn malu awyr a thwyllo,

‘Dw i'n addo y cewch chi joio

digonedd o win a chwrw!’ –

byddech wrth eich bodd yn gwrando ar hwnnw!

Nodyn o obaith

¹² Bydda i'n eich casglu chi i gyd, bobl Jacob.

Bydda i'n galw pawb sydd ar ôl yn Israel ^Ref

at ei gilydd fel defaid mewn corlan.

Byddwch fel praidd yng nghanol eu porfa

yn brefu, yn dyrfa enfawr o bobl.

¹³ Bydd yr un sy'n torri trwodd

yn eu harwain nhw allan i ryddid.

Byddan nhw'n mynd allan drwy'r giatiau

a gadael gyda'u brenin ar y blaen.

Yr ARGLWYDD ei hun fydd yn eu harwain!”

I'r pen