Micha

MICHA 4

Mae dyddiau gwell i ddod

(Eseia 2:2-4)

¹ Yn y dyfodol, bydd mynydd teml yr ARGLWYDD

wedi'i osod yn ben ar y mynyddoedd eraill

a'i godi'n uwch na'r bryniau.

² Bydd y gwledydd i gyd yn llifo yno

a llawer o bobl yn mynd yno a dweud:

“Dewch! Gadewch i ni ddringo Mynydd yr ARGLWYDD, ^Ref

a mynd i deml Duw Jacob,

iddo ddysgu ei ffyrdd i ni,

ac i ninnau fyw fel mae e am i ni fyw.”

Achos o Seion y bydd yr arweiniad yn dod,

a neges yr ARGLWYDD o Jerwsalem.

³ Bydd e'n barnu achosion rhwng y cenhedloedd^Croes

ac yn setlo dadleuon rhwng y gwledydd mawr pell.

Byddan nhw'n curo'u cleddyfau yn sychau aradr

a'u gwaywffyn yn grymanau tocio.

Fydd gwledydd ddim yn ymladd ei gilydd,

nac yn hyfforddi milwyr i fynd i ryfel.^Croes

⁴ Bydd pawb yn eistedd dan ei winwydden^Croes

a'i goeden ffigys ei hun, heb angen bod ofn.

Mae'r ARGLWYDD hollbwerus wedi addo'r peth!

⁵ Tra mae'r gwledydd o'n cwmpas

yn dilyn eu duwiau eu hunain,

byddwn ni yn dilyn yr ARGLWYDD ein Duw

am byth bythoedd!

Pobl Dduw yn mynd adre o'r gaethglud

⁶ “Bryd hynny,” meddai'r ARGLWYDD,

“bydda i'n galw'r rhai cloff,

ac yn casglu'r rhai sydd ar chwâl,

a'r rhai wnes i eu hanafu.

⁷ Y rhai cloff fydd y cnewyllyn sydd ar ôl;

a bydd y rhai fu ar chwâl yn troi'n genedl gref.

Bydd yr ARGLWYDD yn frenin arnyn nhw

ar Fynydd Seion, o hyn allan ac am byth!”

⁸ A byddi di – y tŵr i wylio'r praidd,

sef dinas gaerog pobl Seion –

yn cael dy safle anrhydeddus yn ôl.

Bydd y deyrnas yn perthyn i Jerwsalem.

⁹ Ond nawr, pam wyt ti'n gweiddi a sgrechian?

Oes gen ti ddim brenin i dy helpu?

Ydy dy arweinydd doeth di wedi marw?

Ai dyna pam ti'n gwingo mewn poen

fel gwraig ar fin cael babi?

¹⁰ Gwingwch a gwaeddwch, bobl Seion,

fel gwraig mewn poen wrth gael babi!

Bydd rhaid i chi adael y ddinas

a gwersylla yng nghefn gwlad,

ar eich ffordd i Babilon.

Ond yno bydd yr ARGLWYDD yn eich achub,

a'ch gollwng yn rhydd o afael y gelyn.

¹¹ Ar hyn o bryd mae gwledydd lawer

wedi casglu i ymladd yn dy erbyn.

“Rhaid dinistrio Jerwsalem,” medden nhw.

“Cawn ddathlu wrth weld Seion yn syrthio!”

¹² Ond dŷn nhw ddim yn gwybod beth ydy bwriad yr ARGLWYDD!

Dŷn nhw ddim yn deall ei gynllun e –

i'w casglu nhw fel gwenith i'r llawr dyrnu!

¹³ Tyrd i ddyrnu, ferch Seion!

Dw i'n mynd i roi cyrn o haearn

a charnau o bres i ti;

a byddi'n sathru llawer o wledydd.

Byddi'n rhoi'r ysbail i gyd i'r ARGLWYDD,

ac yn cyflwyno eu cyfoeth i Feistr y ddaear gyfan.

I'r pen