Micha

MICHA 6

Yr ARGLWYDD yn cyhuddo'i bobl

“Codwch i amddiffyn eich hunain

o flaen y bryniau a'r mynyddoedd!

² Chi fynyddoedd a sylfeini'r ddaear

gwrandwch ar gyhuddiad yr ARGLWYDD.”

(Mae'n dwyn achos yn erbyn ei bobl.

Mae ganddo ddadl i'w setlo gydag Israel.)

³ “Fy mhobl, beth wnes i o'i le?

Beth wnes i i'ch diflasu chi? Atebwch!

⁴ Fi wnaeth eich achub chi o wlad yr Aifft,^Croes

a'ch rhyddhau o fod yn gaethweision.

Anfonais Moses i'ch arwain,

ac Aaron a Miriam gydag e.

⁵ Fy mhobl, cofiwch beth roedd Balac, brenin Moab, am ei wneud,^Croes

a sut wnaeth Balaam fab Beor ei ateb.

Cofiwch beth ddigwyddodd rhwng Sittim a Gilgal ^Ref –

i chi weld fod yr ARGLWYDD wedi'ch trin yn deg.”

Beth ddylai ymateb y bobl fod?

⁶ Sut alla i dalu i'r ARGLWYDD?

Beth sydd gen i i'w gynnig wrth blygu

i addoli y Duw mawr?

Ydy aberthau i'w llosgi yn ddigon?

Y lloi gorau ^Ref i'w llosgi'n llwyr?

Fyddai mil o hyrddod yn ei blesio,

neu afonydd diddiwedd o olew olewydd?

⁷ Ddylwn i aberthu fy mab hynaf

yn dâl am wrthryfela? –

rhoi bywyd fy mhlentyn am fy mhechod?

⁸ Na, mae'r ARGLWYDD wedi dweud beth sy'n dda,

a beth mae e eisiau gen ti:

Hybu cyfiawnder, bod yn hael bob amser,

a byw'n wylaidd ac ufudd i dy Dduw.

Bydd yr ARGLWYDD yn cosbi'r arweinwyr

⁹ “Gwrandwch!” Mae'r ARGLWYDD yn galw pobl Jerwsalem –

(Mae'n beth doeth i barchu dy enw, o Dduw.)

“Gwrandwch lwyth Jwda a'r rhai sy'n casglu yn y ddinas!

¹⁰ Ydw i'n mynd i anwybyddu'r trysorau a gawsoch drwy dwyll,

a'r mesur prin, sy'n felltith?

¹¹ Fyddai'n iawn i mi oddef y clorian sy'n dweud celwydd,

a'r bag o bwysau ysgafn? ^Ref

¹² Mae'r cyfoethog yn treisio'r tlawd,

a'r bobl i gyd yn dweud celwydd –

twyll ydy eu hiaith gyntaf nhw!

¹³ Dw i'n mynd i'ch taro a'ch anafu'n ddifrifol,

cewch eich dinistrio am bechu.

¹⁴ Byddwch yn bwyta,

ond byth yn cael digon.^Croes

Bydd eich plentyn yn marw'n y groth,

cyn cael ei eni;

a bydda i'n gadael i'r cleddyf ladd

y rhai sy'n cael eu geni!

¹⁵ Byddwch yn plannu cnydau

ond byth yn medi'r cynhaeaf.

Byddwch yn gwasgu'r olewydd

ond gewch chi ddim defnyddio'r olew.

Byddwch yn sathru'r grawnwin,

ond gewch chi ddim yfed y gwin.^Croes

¹⁶ Dych chi'n cadw deddfau drwg y Brenin Omri,^Croes

ac efelychu arferion drwg y Brenin Ahab! ^Ref –

a dilyn eu polisïau pwdr.

Felly bydd rhaid i mi eich dinistrio chi,

a bydd pobl yn eich gwawdio

ac yn gwneud sbort am eich pen.”

I'r pen