Numeri

Hafan

Hen Destament

Testament Newydd

NUMERI 8

Gosod y Lampau

¹ A dyma'r ARGLWYDD yn dweud wrth Moses: ² “Dwed wrth Aaron, ‘Pan fyddi'n gosod y lampau yn eu lle, gwna'n siŵr fod y saith lamp yn taflu'u golau o flaen y menora.’” ³ A dyma Aaron yn gwneud hynny. Dyma fe'n gosod y lampau fel eu bod yn taflu'u golau o flaen y menora, fel roedd yr ARGLWYDD wedi dweud wrth Moses. ⁴ Gwaith morthwyl oedd y menora – aur wedi'i guro. Roedd yn waith morthwyl o'i goes i'w betalau. Cafodd ei wneud i'r union batrwm roedd yr ARGLWYDD wedi'i ddangos i Moses.

Puro a chysegru'r Lefiaid

⁵ Dyma'r ARGLWYDD yn dweud wrth Moses: ⁶ “Rwyt i gymryd y Lefiaid o blith pobl Israel a mynd drwy'r ddefod o'u puro nhw. ⁷ A dyma sut mae gwneud hynny: Rwyt i daenellu dŵr y puro arnyn nhw. Wedyn rhaid iddyn nhw siafio'u corff i gyd, golchi eu dillad, ac ymolchi. ⁸ Wedyn maen nhw i gymryd tarw ifanc, gyda'i offrwm o rawn (sef y blawd gwenith gorau wedi'i gymysgu gydag olew olewydd). Yna cymryd tarw ifanc arall yn offrwm puro. ⁹ Wedyn rwyt i fynd â'r Lefiaid i sefyll o flaen pabell presenoldeb Duw, a chasglu pobl Israel i gyd at ei gilydd yno. ¹⁰ Yna mae'r bobl i osod eu dwylo ar y Lefiaid tra maen nhw'n sefyll o flaen yr ARGLWYDD. ¹¹ Wedyn mae Aaron i gyflwyno'r Lefiaid i'r ARGLWYDD fel offrwm sbesial gan bobl Israel, i'w cysegru nhw i waith yr ARGLWYDD. ¹² Wedyn bydd y Lefiaid yn gosod eu dwylo ar ben y ddau darw ifanc. Bydd un yn offrwm puro, a'r llall yn cael ei offrymu i'w losgi'n llwyr i'r ARGLWYDD, i wneud pethau'n iawn rhwng Duw a'r Lefiaid. ¹³ Yna mae'r Lefiaid i sefyll o flaen Aaron a'i feibion, i'w cyflwyno nhw'n offrwm sbesial i'r ARGLWYDD. ¹⁴ A dyna sut mae'r Lefiaid i gael eu gosod ar wahân i weddill pobl Israel. Fi fydd piau'r Lefiaid.”

¹⁵ “Bydd y Lefiaid wedyn yn mynd i wneud eu gwaith yn y Tabernacl, ar ôl cael eu puro a'u cyflwyno'n offrwm sbesial i mi. ¹⁶ Maen nhw wedi cael eu rhoi i weithio i mi yn unig. Dw i'n eu cymryd nhw yn lle meibion hynaf pobl Israel. ¹⁷ Fi piau'r meibion hynaf i gyd, a hefyd bob anifail cyntaf i gael ei eni. Rôn i wedi'u cysegru nhw i mi fy hun pan wnes i ladd pob mab ac anifail cyntaf i gael ei eni yng ngwlad yr Aifft. ¹⁸ Ond dw i wedi cymryd y Lefiaid yn lle meibion hynaf pobl Israel. ¹⁹ A dw i wedi rhoi'r Lefiaid i Aaron a'i feibion i weithio ar ran pobl Israel yn y Tabernacl. Hefyd i wneud pethau'n iawn rhwng Duw a phobl Israel, fel bod dim pla yn taro pobl Israel pan maen nhw'n mynd yn agos i'r cysegr.”

²⁰ Felly dyma Moses ac Aaron a phobl Israel i gyd yn cysegru'r Lefiaid. Dyma nhw'n gwneud yn union fel roedd yr ARGLWYDD wedi dweud wrth Moses. ²¹ Dyma'r Lefiaid yn mynd drwy'r ddefod o buro'u hunain, a golchi eu dillad. Yna dyma Aaron yn eu cyflwyno nhw yn offrwm sbesial i'r ARGLWYDD. Ac wedyn dyma fe'n mynd drwy'r ddefod o wneud pethau'n iawn rhyngddyn nhw a Duw, er mwyn eu puro nhw. ²² Wedi hynny, dyma'r Lefiaid yn mynd i'r Tabernacl i wneud eu gwaith, yn helpu Aaron a'i feibion. Dyma nhw'n gwneud yn union fel roedd yr ARGLWYDD wedi dweud wrth Moses.

²³ Yna dyma'r ARGLWYDD yn dweud wrth Moses: ²⁴ “Dyma fydd y drefn gyda'r Lefiaid: Maen nhw'n cael dechrau gweithio yn y Tabernacl yn ddau ddeg pump oed, ²⁵ a rhaid iddyn nhw ymddeol pan fyddan nhw'n bum deg oed. ²⁶ Ar ôl ymddeol, maen nhw'n cael dal i helpu'r Lefiaid eraill pan mae angen, ond fyddan nhw ddim yn gwneud y gwaith eu hunain. Dyna fydd y drefn gyda gwaith y Lefiaid.”

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity