Diarhebion

Pennod 15

¹ Mae ateb caredig yn tawelu tymer;

ond dweud pethau cas yn gwylltio pobl.

² Mae geiriau person doeth yn hybu gwybodaeth,

ond mae cegau ffyliaid yn chwydu ffolineb.

³ Mae'r ARGLWYDD yn gweld popeth,

mae'n gwylio'r drwg a'r da.

⁴ Mae gair caredig fel coeden sy'n rhoi bywyd,

ond mae dweud celwydd yn anafu.

⁵ Mae'r ffŵl yn diystyru disgyblaeth ei dad,

ond mae'r sawl sy'n gwrando ar gerydd yn gall.

⁶ Mae digon o gyfoeth yn nhŷ person cyfiawn,

ond trafferthion fydd unig gyflog pobl ddrwg.

⁷ Mae pobl ddoeth yn rhannu gwybodaeth;

ond dydy ffyliaid ddim yn gwneud hynny.

⁸ Mae'n gas gan yr ARGLWYDD offrymau pobl ddrwg,

ond mae gweddi'r rhai sy'n byw yn iawn yn ei blesio.

⁹ Mae'n gas gan yr ARGLWYDD ymddygiad pobl ddrwg,

ond mae'n caru'r rhai sy'n ymdrechu i fyw'n iawn.

¹⁰ Mae'r un sydd wedi troi cefn ar y ffordd yn cael ei ddisgyblu'n llym;

bydd yr un sy'n gwrthod cael ei gywiro yn marw.

¹¹ Mae'r ARGLWYDD yn gweld beth sy'n digwydd yn Annwfn ^Ref ,

felly mae'n sicr yn gwybod beth sy'n mynd trwy feddyliau pobl!

¹² Dydy'r un sy'n gwawdio pobl eraill ddim yn hoffi cael ei gywiro;

dydy e ddim yn fodlon gofyn cyngor gan rywun doeth.

¹³ Mae calon lawen yn rhoi gwên ar yr wyneb;

ond mae calon drist yn llethu'r ysbryd.

¹⁴ Mae person call eisiau dysgu mwy;

ond mae ffŵl yn cael ei fwydo ar ffolineb.

¹⁵ Mae pobl sy'n diodde yn cael bywyd caled,

ond mae bodlonrwydd fel gwledd ddiddiwedd.

¹⁶ Mae ychydig bach gan rywun sy'n parchu'r ARGLWYDD

yn well na chyfoeth mawr gyda helbulon.

¹⁷ Mae platiad o lysiau ble mae cariad

yn well na gwledd o gig eidion â chasineb.

¹⁸ Mae rhywun sy'n fyr ei dymer yn creu helynt;

ond mae person amyneddgar yn tawelu ffrae.

¹⁹ Mae'r ffordd mae person diog yn ymddwyn fel llwyn o fieri,

ond mae llwybr yr un sy'n gwneud beth sy'n iawn fel priffordd agored.

²⁰ Mae plentyn doeth yn gwneud ei dad yn hapus;

ond plentyn ffôl yn codi cywilydd ar ei fam.

²¹ Mae chwarae'r ffŵl yn hwyl i rywun heb sens;

ond mae person call yn gwneud beth sy'n iawn.

²² Mae cynlluniau'n mynd ar chwâl heb ymgynghori,

ond yn llwyddo pan fydd llawer yn rhoi cyngor.

²³ Mae ateb parod yn gwneud rhywun yn hapus,

ac mor dda ydy gair yn ei bryd!

²⁴ Mae llwybr bywyd ar i fyny i'r doeth,

ac yn ei droi oddi wrth Sheol isod.

²⁵ Bydd yr ARGLWYDD yn chwalu tŷ y balch,

ond mae'n gwneud ffiniau'r weddw yn ddiogel.

²⁶ Mae'n gas gan yr ARGLWYDD feddyliau drwg,

ond mae geiriau caredig yn bur yn ei olwg.

²⁷ Mae rhywun sy'n elwa ar draul eraill yn creu trwbwl i'w deulu;

ond bydd yr un sy'n gwrthod cil-dwrn yn cael byw yn hir.

²⁸ Mae'r person cyfiawn yn meddwl cyn ateb,

tra mae'r person drwg yn chwydu aflendid.

²⁹ Mae'r ARGLWYDD yn cadw draw oddi wrth bobl ddrwg,

ond mae'n gwrando ar weddi'r rhai sy'n byw'n gywir.

³⁰ Mae gwên yn llonni'r galon;

a newyddion da yn rhoi cryfder i'r corff.

³¹ Mae'r glust sy'n gwrando ar gerydd buddiol

yn byw yng nghwmni'r doeth.

³² Mae'r un sy'n gwrthod cael ei gywiro yn ei gasáu ei hun;

ond yr un sy'n gwrando ar gerydd yn dangos synnwyr.

³³ Mae parchu'r ARGLWYDD yn dysgu doethineb;

a gostyngeiddrwydd yn dod o flaen anrhydedd.

I'r pen