Salmau

Salm 108

Gweddi am help yn erbyn y gelyn

(Salm 57:7-11; 60:5-12)

¹ Dw i'n gwbl benderfynol, O Dduw.

Dw i am ymroi yn llwyr i ganu mawl i ti!

² Deffro, nabl a thelyn!

Dw i am ddeffro'r wawr gyda'm cân!

³ Dw i'n mynd i ddiolch i ti, O ARGLWYDD, o flaen pawb!

Dw i'n mynd i ganu mawl i ti o flaen pobl o bob cenedl!

⁴ Mae dy gariad di'n uwch na'r nefoedd,

a dy ffyddlondeb di'n uwch na'r cymylau!

⁵ Dangos dy hun yn uwch na'r nefoedd, O Dduw,

i dy ysblander gael ei weld drwy'r byd i gyd!

⁶ Defnyddia dy gryfder o'n plaid, ac ateb ni

er mwyn i dy rai annwyl gael eu hachub.

⁷ Mae Duw wedi addo yn ei gysegr:

“Dw i'n mynd i fwynhau rhannu Sichem,

a mesur dyffryn Swccoth.

⁸ Fi sydd piau Gilead

a Manasse hefyd.

Effraim ydy fy helmed i,

a Jwda ydy'r deyrnwialen.

⁹ Ond bydd Moab fel powlen ymolchi.

Byddaf yn taflu fy esgid at Edom,

ac yn gorfoleddu ar ôl gorchfygu Philistia!”

¹⁰ Pwy sy'n gallu mynd â fi i'r ddinas ddiogel?

Pwy sy'n gallu fy arwain i Edom?

¹¹ Onid ti, O Dduw?

Ond rwyt wedi'n gwrthod ni!

Wyt ti ddim am fynd allan gyda'n byddin, O Dduw?

¹² Plîs, helpa ni i wynebu'r gelyn,

achos dydy help dynol yn dda i ddim.

¹³ Gyda Duw gallwn wneud pethau mawrion —

bydd e'n sathru ein gelynion dan draed!

I'r pen