Salmau

Salm 118

Gweddi o ddiolch am ddaioni Duw

¹ Diolchwch i'r ARGLWYDD!

Mae e mor dda aton ni!

Mae ei haelioni yn ddiddiwedd!

² Gadewch i Israel gyfan ddweud,

“Mae ei haelioni yn ddiddiwedd.”

³ Gadewch i'r offeiriaid ddweud,

“Mae ei haelioni yn ddiddiwedd.”

⁴ Gadewch i bawb arall sy'n addoli'r ARGLWYDD ddweud,

“Mae ei haelioni yn ddiddiwedd.”

⁵ Ro'n i mewn helbul, a dyma fi'n galw ar yr ARGLWYDD.

Dyma'r ARGLWYDD yn ateb ac yn fy helpu i ddianc.

⁶ Mae'r ARGLWYDD ar fy ochr,

felly fydd gen i ddim ofn.

Beth all pobl ei wneud i mi?

⁷ Mae'r ARGLWYDD ar fy ochr i'm helpu,

felly bydda i'n gweld fy ngelynion yn syrthio.

⁸ Mae'n llawer gwell troi at yr ARGLWYDD am loches

na trystio pobl feidrol!

⁹ Mae'n llawer gwell troi at yr ARGLWYDD am loches

na trystio'r arweinwyr.

¹⁰ Roedd y paganiaid yn ymosod arna i;

ond dyma'r ARGLWYDD yn fy helpu i'w gyrru nhw i ffwrdd.

¹¹ Roedden nhw'n ymosod arna i o bob cyfeiriad;

ond dyma'r ARGLWYDD yn fy helpu i'w gyrru nhw i ffwrdd.

¹² Roedden nhw o'm cwmpas i fel haid o wenyn;

ond dyma nhw'n diflannu mor sydyn â drain yn llosgi.

Dyma'r ARGLWYDD yn fy helpu i'w gyrru i ffwrdd.

¹³ Roedden nhw'n gwasgu arna i'n galed,

a bu bron i mi syrthio;

ond dyma'r ARGLWYDD yn fy helpu.

¹⁴ Yr ARGLWYDD sy'n rhoi nerth a chân i mi!

Fe sydd wedi fy achub i.^Croes

¹⁵ Mae pobl Dduw i'w clywed yn canu am y fuddugoliaeth yn eu pebyll,

“Mae'r ARGLWYDD mor gryf!

¹⁶ Mae'r ARGLWYDD yn fuddugol!

Mae ARGLWYDD mor gryf!”

¹⁷ Dw i'n fyw! Wnes i ddim marw!

Bydda i'n dweud beth wnaeth yr ARGLWYDD!

¹⁸ Roedd yr ARGLWYDD wedi fy nghosbi'n llym,

ond wnaeth e ddim gadael i mi gael fy lladd.

¹⁹ Agorwch giatiau cyfiawnder i mi

er mwyn i mi fynd i mewn i ddiolch i'r ARGLWYDD!

²⁰ Giât yr ARGLWYDD ydy hon —

dim ond y rhai cyfiawn sy'n cael mynd trwyddi.

²¹ Diolch i ti am ateb fy ngweddi,

ac am fy achub i.

²² Mae'r garreg wrthododd yr adeiladwyr

wedi cael ei gwneud yn garreg sylfaen.

²³ Yr ARGLWYDD wnaeth hyn,

mae'r peth yn rhyfeddol yn ein golwg!

²⁴ Mae heddiw'n ddiwrnod i'r ARGLWYDD —

gadewch i ni ddathlu a bod yn llawen!

²⁵ O ARGLWYDD, plîs achub ni!

O ARGLWYDD, gwna i ni lwyddo!

²⁶ Mae'r un sy'n dod i gynrychioli'r ARGLWYDD

wedi ei fendithio'n fawr —

Bendith arnoch chi i gyd o deml yr ARGLWYDD!

²⁷ Yr ARGLWYDD ydy'r Duw go iawn,

ac mae wedi rhoi ei olau i ni.

Gadewch i ni ddathlu!

Ewch at yr allor gyda changhennau coed palmwydd.

²⁸ Ti ydy fy Nuw i a dw i'n diolch i ti!

Ti ydy fy Nuw i a dw i'n dy ganmol di!

²⁹ Diolchwch i'r ARGLWYDD!

Mae e mor dda aton ni!

Mae ei haelioni yn ddiddiwedd!

I'r pen