Salmau

Salm 132

Canmol y Deml

¹ O ARGLWYDD, paid anghofio Dafydd.

Roedd e wedi cael amser mor galed.

² Roedd e wedi addo i'r ARGLWYDD

a mynd ar ei lw i Un Cryf Jacob:

³ “Dw i ddim am fynd i'r tŷ,

na dringo i'm gwely;

⁴ dw i ddim am adael i'm llygaid orffwys,

na chau fy amrannau,

⁵ nes dod o hyd i le i'r ARGLWYDD,

ie, rhywle i Un Cryf Jacob fyw.”

⁶ Clywson fod yr Arch yn Effrata;

a dod o hyd iddi yng nghefn gwlad Jaar. ^Ref

⁷ Gadewch i ni fynd i mewn i'w dabernacl,

ac ymgrymu wrth ei stôl droed!^Croes

⁸ O ARGLWYDD, dos i fyny i dy deml

gyda dy Arch bwerus!

⁹ Boed i dy offeiriaid wisgo cyfiawnder,

boed i'r rhai sy'n ffyddlon i ti weiddi'n llawen!

¹⁰ Paid troi cefn ar yr un rwyt wedi ei eneinio

o achos Dafydd dy was.

¹¹ Roedd yr ARGLWYDD wedi addo i Dafydd

— aeth ar ei lw, a dydy e ddim yn torri ei air —

“Dw i'n mynd i osod un o dy ddisgynyddion di ar dy orsedd.

¹² Os bydd dy feibion yn cadw'r ymrwymiad wnaethon ni

a'r amodau dw i wedi eu gosod iddyn nhw,

bydd dy linach frenhinol yn para am byth.”

¹³ Mae'r ARGLWYDD wedi dewis Seion;

mae e wedi penderfynu aros yno.

¹⁴ “Dyma ble bydda i yn gorffwys am byth,” meddai,

“dw i'n mynd i deyrnasu yma. Ie, dyna dw i eisiau.

¹⁵ Dw i'n mynd i'w gwneud hi'n ddinas lwyddiannus,

a rhoi digonedd o fwyd i'r rhai anghenus ynddi.

¹⁶ Dw i'n mynd i roi achubiaeth yn wisg i'w hoffeiriaid,

a bydd ei rhai ffyddlon yn gweiddi'n llawen!

¹⁷ Dw i'n mynd i godi olynydd cryf i Dafydd;

bydd fel lamp wedi ei rhoi i oleuo'r bobl.

¹⁸ Bydda i'n gwisgo ei elynion mewn cywilydd,

ond bydd coron yn disgleirio ar ei ben e.”

I'r pen