Salmau

Salm 14

Drygioni'r galon ddynol

(Salm 53)

¹ Dim ond ffŵl sy'n meddwl wrtho'i hun,

“Dydy Duw ddim yn bodoli.”

Mae pobl yn gwneud pob math o bethau ffiaidd;

does neb yn gwneud daioni.

² Mae'r ARGLWYDD yn edrych i lawr

o'r nefoedd ar y ddynoliaeth

i weld os oes unrhyw un call;

unrhyw un sy'n ceisio Duw.

³ Ond mae pawb wedi troi cefn arno,

ac yn gwbl lygredig.

Does neb yn gwneud daioni —

dim un!

⁴ Ydyn nhw wir mor dwp — yr holl rhai drwg

sy'n llarpio fy mhobl fel taen nhw'n llowcio bwyd,

a byth yn galw ar yr ARGLWYDD?

⁵ Byddan nhw'n dychryn am eu bywydau,

am fod Duw yn gofalu am y rhai cyfiawn.

⁶ Dych chi'n ceisio drysu hyder yr anghenus,

ond mae'r ARGLWYDD yn ei gadw'n saff.

⁷ O, dw i eisiau i'r un sy'n achub Israel ddod o Seion!

Pan fydd yr ARGLWYDD yn troi'r sefyllfa rownd

bydd Jacob yn gorfoleddu,

a bydd Israel mor hapus!

I'r pen