Salmau

Salm 146

Moli'r Duw sy'n achub

Mola'r ARGLWYDD, meddwn i wrthof fy hun!

² Dw i'n mynd i foli'r ARGLWYDD ar hyd fy mywyd,

a chanu mawl i'm Duw tra dw i'n bodoli!

³ Paid trystio'r rhai sy'n teyrnasu —

dyn meidrol sydd ddim yn gallu achub.

⁴ Mae'r anadl yn mynd allan ohono,

ac mae'n mynd yn ôl i'r pridd;

a'r diwrnod hwnnw mae ei holl bolisïau yn dod i ben!

⁵ Mae'r un mae Duw Jacob yn ei helpu wedi ei fendithio'n fawr,

Yr un sy'n dibynnu ar yr ARGLWYDD ei Dduw,

⁶ y Duw a wnaeth y nefoedd, y ddaear,

y môr a phopeth sydd ynddyn nhw.

Mae e bob amser yn cadw ei air,

⁷ yn rhoi cyfiawnder i'r rhai sy'n cael eu gorthrymu,

a bwyd i'r rhai newynog.

Mae'r ARGLWYDD yn gollwng carcharorion yn rhydd.

⁸ Mae'r ARGLWYDD yn rhoi eu golwg i bobl ddall.

Mae'r ARGLWYDD yn gwneud i bawb sydd wedi eu plygu drosodd sefyll yn syth.

Mae'r ARGLWYDD yn caru'r rhai sy'n gwneud beth sy'n iawn.

⁹ Mae'r ARGLWYDD yn gofalu am y mewnfudwyr

ac yn cynnal y plant amddifad a'r gweddwon.

Ond mae e'n gwneud i'r rhai drwg golli eu ffordd.

¹⁰ Bydd yr ARGLWYDD yn teyrnasu am byth;

dy Dduw di, Seion, ar hyd y cenedlaethau.

Haleliwia!

I'r pen