Salmau

Salm 2

Y brenin mae'r ARGLWYDD wedi ei ddewis

¹ Pam mae'r cenhedloedd yn gwrthryfela?

Pam mae pobloedd yn gwastraffu eu hamser yn cynllwynio?

² Mae brenhinoedd daearol yn gwneud safiad;

a'r llywodraethwyr yn dod at ei gilydd i ymladd

yn erbyn yr ARGLWYDD a'r un mae wedi'i ddewis ^Ref , y brenin.

³ “Gadewch i ni dorri'n rhydd o'u cadwynau,

a thaflu'r rhaffau sy'n ein rhwymo i ffwrdd!”

⁴ Mae'r Un sydd ar ei orsedd yn y nefoedd yn chwerthin —

maen nhw'n destun sbort i'r ARGLWYDD!

⁵ Wedyn mae'n eu dychryn am ei fod mor ffyrnig,

ac yn dweud wrthyn nhw'n ddig:

⁶ “Dw i wedi gosod fy mrenin yn Seion,

fy mynydd cysegredig!”

⁷ Gadewch i mi ddweud beth mae'r ARGLWYDD wedi ei ddatgan:

Dwedodd wrtho i,

“Ti ydy fy mab i;

heddiw des i yn Dad i ti.

⁸ Dim ond i ti ofyn,

cei etifeddu'r cenhedloedd.

Bydd dy ystad di yn ymestyn i ben draw'r byd.

⁹ Byddi'n eu malu â phastwn haearn

yn ddarnau mân, fel darn o grochenwaith.”

¹⁰ Felly, chi frenhinoedd, byddwch ddoeth;

dysgwch eich gwers, chi arweinwyr daearol!

¹¹ Gwasanaethwch yr ARGLWYDD gyda pharch;

byddwch yn falch ei fod wedi'ch dychryn chi!

¹² Plygwch, a thalu teyrnged i'r ^Ref mab;

neu bydd yn digio a cewch eich difa

pan fydd yn dangos mor ddig ydy e.

Mae pawb sy'n troi ato am loches

wedi eu bendithio'n fawr!

I'r pen