Salmau

Salm 30

Gweddi o ddiolch

¹ Dw i'n dy ganmol di, O ARGLWYDD,

am i ti fy nghodi ar fy nhraed;

wnest ti ddim gadael i'm gelynion ddathlu.

² O ARGLWYDD, fy Nuw,

gwaeddais arnat ti

a dyma ti'n fy iacháu i.

³ O ARGLWYDD, codaist fi allan o fyd y meirw;

a'm cadw rhag disgyn i'r bedd.

⁴ Canwch i'r ARGLWYDD, chi sy'n ei ddilyn yn ffyddlon,

a'i foli wrth gofio mor sanctaidd ydy e!

⁵ Dim ond am foment mae e'n ddig.

Pan mae'n dangos ei ffafr mae'n rhoi bywyd.

Gall rhywun fod yn crïo wrth fynd i orwedd gyda'r nos;

ond erbyn y bore mae pawb yn dathlu'n llawen.

⁶ Roedd popeth yn mynd yn dda

a minnau'n meddwl, “All dim byd fynd o'i le.”

⁷ Pan oeddet ti'n dangos dy ffafr, ARGLWYDD,

roeddwn i'n gadarn fel y graig.

Ond dyma ti'n troi dy gefn arna i,

ac roedd arna i ofn am fy mywyd.

⁸ Dyma fi'n galw arnat ti, ARGLWYDD,

ac yn pledio arnat ti fy Meistr:

⁹ “Beth ydy'r pwynt os gwna i farw,

a disgyn i'r bedd?

Fydd fy llwch i'n gallu dy foli di?

Fydd e'n gallu sôn am dy ffyddlondeb?

¹⁰ Gwranda arna i, ARGLWYDD,

dangos drugaredd ata i.

O ARGLWYDD, helpa fi!”

¹¹ Yna dyma ti'n troi fy nhristwch yn ddawns;

tynnu'r sachliain a rhoi gwisg i mi ddathlu!

¹² Felly dw i'n mynd i ganu i ti gyda'm holl galon —

wna i ddim tewi!

O ARGLWYDD fy Nuw,

bydda i'n dy foli di bob amser.

I'r pen