Salmau

Salm 32

Cyffes a maddeuant

¹ Mae'r un sydd wedi cael maddeuant am ei wrthryfel

wedi ei fendithio'n fawr,

mae ei bechodau wedi eu symud o'r golwg am byth.

² Mae'r un dydy'r ARGLWYDD ddim yn dal ati

i gyfri ei fai yn ei erbyn wedi ei fendithio'n fawr —

yr un sydd heb dwyll yn agos i'w galon.

³ Pan oeddwn i'n cadw'n ddistaw am y peth,

roedd fy esgyrn yn troi'n frau

ac roeddwn i'n tuchan mewn poen drwy'r dydd.

⁴ Roeddet ti'n fy mhoenydio i nos a dydd;

doedd gen i ddim egni,

fel pan mae'r gwres yn llethol yn yr haf.

Saib

⁵ Ond wedyn dyma fi'n cyfaddef fy mhechod.

Wnes i guddio dim byd.

“Dw i'n mynd i gyffesu'r cwbl i'r ARGLWYDD” meddwn i,

ac er fy mod i'n euog dyma ti'n maddau'r cwbl.

Saib

⁶ Felly, pan mae rhywun sy'n dy ddilyn di'n ffyddlon

yn darganfod ei fod wedi pechu,

dylai weddïo arnat ti;

rhag i'r dyfroedd peryglus ei ysgubo i ffwrdd.

⁷ Ti ydy'r lle saff i mi guddio!

Ti'n fy amddiffyn i rhag trafferthion.

Mae pobl o'm cwmpas yn dathlu'n llawen

am dy fod ti wedi achub.

Saib

⁸ Gadewch i mi ddangos y ffordd i chi,

a'ch helpu chi i wybod sut i fyw.

Gadewch i mi roi cyngor i chi, wyneb yn wyneb.

⁹ Peidiwch bod yn ystyfnig fel mul

sy'n gwrthod bod yn ufudd,

neu geffyl sydd angen ffrwyn i gadw rheolaeth arno.

¹⁰ Mae pobl ddrwg yn mynd i ddioddef yn fawr,

ond mae'r ARGLWYDD yn hollol ffyddlon

i'r rhai sy'n ei drystio fe.

¹¹ Felly chi sy'n gwneud beth sy'n iawn,

Dathlwch beth mae'r ARGLWYDD wedi ei wneud! Gorfoleddwch!

Bloeddiwch yn llawen, bawb sy'n byw'n gywir!

I'r pen