Salmau

Salm 48

Seion, dinas Duw

¹ Mae'r ARGLWYDD mor fawr

ac mae'n haeddu ei foli!

Yn ninas ein Duw

ar ei fynydd cysegredig —

² y copa hardd sy'n gwneud yr holl fyd yn hapus.

Mynydd Seion, sydd fel copaon Saffon ^Ref ,

ydy dinas y Brenin mawr.

³ Mae Duw yn byw yn ei chaerau,

ac mae'n adnabyddus fel caer ddiogel.

⁴ Edrychwch! Mae brenhinoedd yn ffurfio cynghrair,

ac yn dod i ymosod gyda'i gilydd.

⁵ Ond ar ôl ei gweld roedden nhw'n fud,

wedi dychryn am eu bywydau,

ac yn dianc mewn panig!

⁶ Roedden nhw'n crynu trwyddynt,

ac yn gwingo fel gwraig yn geni plentyn,

⁷ neu longau Tarshish yn cael eu dryllio

gan wynt y dwyrain.

⁸ Dŷn ni bellach yn dystion

i'r math o beth y clywson ni amdano;

yn ninas yr ARGLWYDD holl-bwerus,

sef dinas ein Duw —

mae e wedi ei gwneud hi'n ddiogel am byth!

Saib

⁹ O Dduw, dŷn ni wedi bod yn myfyrio yn dy deml

am dy ofal ffyddlon.

¹⁰ O Dduw, rwyt ti'n enwog drwy'r byd i gyd,

ac yn haeddu dy foli!

Rwyt ti yn sicrhau cyfiawnder.

¹¹ Mae mynydd Seion yn gorfoleddu!

Mae pentrefi Jwda yn llawen,

o achos beth wnest ti.

¹² Cerdda o gwmpas Seion,

dos reit rownd!

Cyfra'r tyrau,

¹³ edrych yn fanwl ar ei waliau,

a dos drwy ei chaerau,

er mwyn i ti allu dweud wrth y genhedlaeth nesa.

¹⁴ Dyma sut un ydy Duw, ein Duw ni, bob amser.

Bydd e'n ein harwain ni tra byddwn ni byw.

I'r pen