Salmau

Salm 62

Y Duw sy'n ein cadw'n saff

¹ Ydw, dw i'n disgwyl yn dawel am Dduw;

fe ydy'r un all fy achub i.

² Ie, fe ydy'r graig lle dw i'n ddiogel;

lle i mi gysgodi sy'n hollol saff.

³ Pryd ydych chi'n mynd i stopio ymosod ar ddyn?

Ymosod arno i'w ddifa fel wal sydd ar fin syrthio,

neu ffens sy'n simsan?

⁴ Ydyn, maen nhw'n cynllunio i'w fwrw i lawr

o'i safle dylanwadol.

Maen nhw wrth eu boddau gyda chelwydd;

maen nhw'n dweud pethau sy'n swnio'n garedig,

ond yn ei felltithio yn eu calonnau.

Saib

⁵ Ie, disgwyl di'n dawel am Dduw, fy enaid,

achos fe ydy dy obaith di.

⁶ Fe ydy'r graig lle dw i'n ddiogel;

lle i mi gysgodi sy'n hollol saff.

⁷ Mae Duw'n edrych ar ôl fy lles i,

ac mae'n rhoi nerth i mi.

Dw i'n gadarn fel y graig,

ac yn hollol saff gyda Duw.

⁸ Gallwch ei drystio fe bob amser, bobl!

Tywalltwch beth sydd ar eich calon o'i flaen.

Duw ydy'n hafan ddiogel ni.

Saib

⁹ Dydy pobl gyffredin ddim byd ond anadl;

a pobl bwysig yn ddim ond rhith!

Rhowch nhw ar glorian ac mae hi'n codi! —

maen nhw i gyd yn pwyso llai nag anadl.

¹⁰ Peidiwch trystio trais i ennill cyfoeth.

Peidiwch rhoi'ch gobaith mewn lladrad.

Os ydych chi'n ennill cyfoeth mawr

peidiwch dibynnu arno.

¹¹ Un peth mae Duw wedi ei ddweud,

ac mae wedi ei gadarnhau:

Duw ydy'r un nerthol,

¹² Ie ti, O ARGLWYDD, ydy'r un ffyddlon,

sy'n rhoi i bawb beth maen nhw'n ei haeddu.

I'r pen