Salmau

Salm 63

Hiraeth am Dduw

¹ O Dduw, ti ydy fy Nuw i!

Dw i wir yn dy geisio di.

Mae fy enaid yn sychedu amdanat.

Mae fy nghorff yn dyheu amdanat,

fel tir sych ac anial sydd heb ddŵr.

² Ydw, dw i wedi dy weld di yn y cysegr,

a gweld dy rym a dy ysblander!

³ Profi dy ffyddlondeb di ydy'r peth gorau am fywyd,

ac mae fy ngwefusau'n dy foli di!

⁴ Dw i'n mynd i dy foli fel yma am weddill fy mywyd;

codi fy nwylo mewn gweddi, a galw ar dy enw.

⁵ Dw i wedi fy modloni'n llwyr, fel ar ôl bwyta gwledd!

Dw i'n canu mawl i ti â gwefusau llawen.

⁶ Dw i'n meddwl amdanat wrth orwedd ar fy ngwely,

ac yn myfyrio arnat ti yng nghanol y nos;

⁷ Dw i'n cofio fel y gwnest ti fy helpu —

ron i'n gorfoleddu,

yn saff dan gysgod dy adenydd.

⁸ Dw i am lynu'n dynn wrthot ti;

dy law gref di sy'n fy nghynnal i.

⁹ Bydd y rhai sy'n ceisio fy lladd i

yn mynd i lawr yn ddwfn i'r ddaear.

¹⁰ Bydd y rhai sydd am fy nharo gyda'r cleddyf

yn cael eu gadael yn fwyd i siacaliaid.

¹¹ Ond bydd y brenin yn dathlu beth wnaeth Duw.

Bydd pawb sy'n tyngu llw iddo yn gorfoleddu,

pan fydd e'n cau cegau y rhai celwyddog!

I'r pen