Salmau

Salm 76

Y Duw sy'n ennill pob brwydr

¹ Mae pawb yn Jwda'n gwybod am Dduw;

mae ganddo enw da yn Israel.

² Mae'n byw ar fynydd Seion,

yn Jerwsalem, dinas heddwch.

³ Dyna ble torrodd e'r saethau tanllyd,

y darian, y cleddyf, a'r holl arfau rhyfel.

Saib

⁴ Ti ydy'r Un Disglair, yr Un Hardd

sy'n dod i lawr o'r mynyddoedd

ar ôl trechu dy elynion.

⁵ Cafodd eu milwyr dewr eu hysbeilio!

Maen nhw'n ‘cysgu’ am y tro ola!

Doedd y rhyfelwr cryfaf ddim yn gallu codi bys!

⁶ Dyma ti'n rhoi bloedd, O Dduw Jacob,

ac roedd pob marchog a gyrrwr cerbyd yn farw.

⁷ O! Rwyt ti mor rhyfeddol!

Pwy sy'n gallu sefyll yn dy erbyn

pan rwyt ti'n ddig?

⁸ Wrth i ti gyhoeddi dy ddedfryd o'r nefoedd,

roedd y ddaear wedi ei pharlysu gan ofn,

⁹ wrth weld Duw yn codi i farnu

ac achub y rhai sy'n cael eu cam-drin yn y tir.

Saib

¹⁰ Bydd rhai mwyaf ffyrnig y ddaear yn dy gydnabod

pan fyddi'n dangos dy ddigofaint yn llawn.

¹¹ Gwnewch addunedau i'r ARGLWYDD eich Duw, a'u cadw!

Boed i bawb sydd o'i gwmpas ddod â rhoddion

i'r Duw sydd i'w ofni!

¹² Mae'n torri crib y llywodraethwyr balch,

ac yn dychryn brenhinoedd y ddaear.

I'r pen