Job

JOB 18

Ymateb Bildad: pobl ddrwg mae Duw'n eu cosbi

² “Pryd wyt ti'n mynd i stopio siarad fel yma?

Meddylia am funud, i ni gael cyfle i drafod.

³ Pam wyt ti'n ein trin ni fel anifeiliaid direswm,

ac yn ein hystyried ni'n dwp?

⁴ Cei rwygo dy hun yn ddarnau yn dy wylltineb,

ond a fydd trefn pethau yn cael ei newid er dy fwyn di?

Fydd y creigiau yn cael eu symud o'u lle?

⁵ Na, mae golau'r rhai drwg yn cael ei ddiffodd;

fydd ei fflam e ddim yn ailgynnau.

⁶ Mae'r golau yn ei babell yn gwanhau,

a'r lamp uwch ei ben yn diffodd.

⁷ Bydd ei gamau hyderus yn troi'n betrus,

a'i gynlluniau ei hun yn ei faglu.

⁸ Mae'n cerdded yn syth i'r rhwyd,

ac yn camu ar y fagl.

⁹ Mae ei droed yn cael ei dal mewn trap,

a'r fagl yn tynhau amdani.

¹⁰ Mae rhaff wedi'i chuddio ar y ddaear i'w ddal;

mae magl ar ei lwybr.

¹¹ Mae'n cael ei ddychryn o bob cyfeiriad,

ac mae ofnau'n ei ddilyn i bobman.

¹² Mae trychineb yn ysu amdano,

a dinistr yn disgwyl iddo lithro.

¹³ Mae ei groen yn cael ei fwyta gan afiechyd,

a'i gorff yn dioddef y farwolaeth fwya erchyll.

¹⁴ Mae'n cael ei lusgo allan o'i babell ddiogel,

a'i alw i ymddangos o flaen brenin braw.

¹⁵ Mae tân yn byw yn ei babell,

a brwmstan yn cael ei chwalu dros ei gartref.

¹⁶ Mae ei wreiddiau yn crino oddi tano,

a'i ganghennau'n gwywo uwch ei ben.

¹⁷ Mae pawb drwy'r wlad wedi anghofio amdano;

does dim sôn am ei enw yn unman.

¹⁸ Mae'n cael ei wthio o'r golau i'r tywyllwch,

a'i yrru i ffwrdd o'r byd.

¹⁹ Heb blant na pherthnasau i'w enw,

a neb ar ôl lle roedd yn byw.

²⁰ Bydd pobl y gorllewin yn synnu at ei dynged,

a phobl y dwyrain wedi dychryn yn lân.

²¹ Ond dyna beth sy'n digwydd i'r rhai drwg;

felly mae hi ar bobl sydd ddim yn nabod Duw.”

I'r pen