Job

JOB 35

Trydydd ymateb Elihw: condemnio Job

² “Wyt ti'n meddwl ei bod hi'n iawn

i ti ddweud, ‘Fi sy'n iawn, nid Duw’?

³ A dweud wrtho, ‘Pa fantais ydy e i ti?’

a ‘Beth ydw i'n ennill o beidio pechu?’

⁴ Gad i mi dy ateb di –

ti, a dy ffrindiau gyda ti.

⁵ Edrych i fyny i'r awyr, ac ystyria;

edrych ar y cymylau ymhell uwch dy ben.

⁶ Os wyt ti'n pechu, sut mae hynny'n effeithio ar Dduw?

Os wyt ti'n troseddu dro ar ôl tro,

beth wyt ti'n ei wneud iddo fe?

⁷ Os wyt ti'n gwneud beth sy'n iawn,

sut mae hynny'n helpu Duw?

Beth mae e'n ei dderbyn gen ti?

⁸ Pobl eraill sy'n diodde pan wyt ti'n gwneud drwg,

neu'n cael eu helpu pan wyt ti'n gwneud beth sy'n iawn.

⁹ Mae pobl sy'n cael eu gorthrymu yn gweiddi am help,

ac yn galw am rywun i'w hachub o afael y rhai pwerus.

¹⁰ Ond does neb yn dweud, ‘Ble mae Duw, fy Nghrëwr,

sy'n rhoi testun cân i mi pan mae'n nos dywyll?

¹¹ Ble mae'r Duw sy'n dysgu mwy i ni na'r anifeiliaid,

ac sy'n ein gwneud ni'n fwy doeth na'r adar?’

¹² Ydyn, mae'r bobl yn gweiddi, ond dydy e ddim yn ateb,

am eu bod nhw'n bobl ddrwg a balch.

¹³ Dŷn nhw ddim o ddifrif – a dydy Duw ddim yn gwrando;

dydy'r Un sy'n rheoli popeth yn cymryd dim sylw.

¹⁴ Felly, pam gwrando arnat ti, sy'n cwyno nad wyt yn ei weld,

fod dy achos o'i flaen, a dy fod yn aros am ymateb?

¹⁵ A hyd yn oed yn honni nad ydy e'n cosbi yn ei ddig,

ac nad ydy e'n poeni dim am bechod!

¹⁶ Mae Job yn siarad nonsens;

mae'n mwydro ymlaen heb ddeall dim.”

I'r pen