Yn ôl

Job

Llyfrau

Hafan

Hen Destament

Testament Newydd

JOB 42

Job yn cyfaddef ei fai

¹ Yna dyma Job yn dweud wrth yr ARGLWYDD:

² “Dw i'n gwybod dy fod ti'n gallu gwneud unrhyw beth;

does dim modd rhwystro dy gynlluniau di.

³ ‘Pwy ydy hwn sy'n amau fy nghynllun i,

ac yn deall dim?’ meddet ti.

Ti'n iawn, dw i wedi siarad am bethau doeddwn i ddim yn eu deall;

pethau oedd y tu hwnt i mi, pethau allwn i mo'u dirnad nhw.

⁴ ‘Gwranda arna i, a gwna i siarad;

Fi fydd yn gofyn y cwestiynau, a gei di ateb,’ meddet ti.

⁵ O'r blaen, wedi clywed amdanat ti oeddwn i,

ond nawr dw i wedi dy weld drosof fy hun.

⁶ Felly, dw i'n tynnu'r cwbl yn ôl,

ac yn edifarhau mewn llwch a lludw.”

Duw yn barnu'r tri ffrind

⁷ Ar ôl i'r ARGLWYDD siarad â Job, dyma fe'n dweud wrth Eliffas o Teman, “Dw i'n ddig iawn gyda ti a dy ddau ffrind, am beidio dweud beth sy'n wir amdana i, yn wahanol i fy ngwas Job. ⁸ Felly cymerwch saith tarw a saith hwrdd a mynd at fy ngwas Job a chyflwyno offrwm i'w losgi drosoch eich hunain. Bydd fy ngwas Job yn gweddïo drosoch chi, a bydda i'n gwrando arno. Felly fydda i ddim yn delio gyda chi fel dych chi'n haeddu am beidio dweud beth sy'n wir amdana i, yn wahanol i fy ngwas Job.”

⁹ Felly dyma Eliffas o Teman, Bildad o Shwach a Soffar o Naamâ yn mynd a gwneud beth ddwedodd yr ARGLWYDD wrthyn nhw, a dyma'r ARGLWYDD yn gwrando ar weddi Job.

Duw yn bendithio Job

¹⁰ Ar ôl i Job weddïo dros ei ffrindiau, dyma'r ARGLWYDD yn rhoi yn ôl iddo y cwbl oedd wedi'i golli – yn wir rhoddodd yr ARGLWYDD iddo ddwywaith cymaint ag o'r blaen.

¹¹ Daeth ei frodyr a'i chwiorydd, a'i hen ffrindiau i gyd, i'w dŷ am bryd o fwyd, ac i gydymdeimlo gydag e a'i gysuro achos yr holl drasiedïau roedd yr ARGLWYDD wedi'u dwyn arno. Rhoddodd pob un ohonyn nhw arian a modrwy aur iddo.

¹² Dyma'r ARGLWYDD yn bendithio Job fwy yn y blynyddoedd ar ôl hynny nag roedd wedi ei wneud yn y blynyddoedd cyn hynny. Roedd ganddo un deg pedair mil o ddefaid, chwe mil o gamelod, mil o barau o ychen, a mil o asennod. ¹³ Hefyd cafodd saith mab a thair merch. ¹⁴ Enw'r ferch hynaf oedd Jemima, Cetsia oedd enw'r ail, a Ceren-hapwch oedd y drydedd. ¹⁵ Doedd dim merched harddach i'w cael yn unman, a rhoddodd Job etifeddiaeth iddyn nhw fel i'w brodyr.

¹⁶ Cafodd Job fyw am gant pedwar deg o flynyddoedd ar ôl hynny, a gwelodd bedair cenhedlaeth o'i ddisgynyddion. ¹⁷ Felly, roedd Job yn hen ŵr mewn oedran mawr pan fuodd e farw.

I'r pen

Safle Llawn

Hawlfraint © Gobaith i Gymru 2025, ar ran y Golygydd (golygydd@beibl.net) Elusen Gofrestredig Rhif: 1078107 Diogelir pob hawl.

Mae'r project yn cael ei noddi eleni gan roddion gwirfoddol unigolion ac eglwysi,
Dylunio gan Mike Leach Creative. Gwesteir gan Zanity