MICHA 1

Dinistrio Samaria yn rhybudd i Jerwsalem

² Gwrandwch, chi bobl i gyd!

Cymrwch sylw, bawb sy'n byw drwy'r byd!

Mae'r ARGLWYDD, y Meistr, yn dyst yn eich erbyn;

mae'n eich cyhuddo chi o'i deml sanctaidd.

³ Edrychwch! Mae'r ARGLWYDD yn dod!

Mae'n dod i lawr ac yn sathru'r mynyddoedd!

⁴ Bydd y mynyddoedd yn dryllio dan ei draed,

a'r dyffrynnoedd yn hollti.

Bydd y creigiau'n toddi fel cwyr mewn tân,

ac yn llifo fel dŵr ar y llethrau.

⁵ Pam? Am fod Jacob wedi gwrthryfela,

a phobl Israel wedi pechu.

Sut mae Jacob wedi gwrthryfela?

Samaria ydy'r drwg!

Ble mae allorau paganaidd Jwda?

Yn Jerwsalem!

⁶ “Dw i'n mynd i droi Samaria

yn bentwr o gerrig mewn cae agored –

bydd yn lle i blannu gwinllannoedd!

Dw i'n mynd i hyrddio ei waliau i'r dyffryn

a gadael dim ond sylfeini'n y golwg.

⁷ Bydd ei delwau'n cael eu dryllio,

ei thâl am buteinio yn llosgi'n y tân,

a'r eilunod metel yn bentwr o sgrap!

Casglodd nhw gyda'i thâl am buteinio, ^Ref

a byddan nhw'n troi'n dâl i buteiniaid eto.”

⁸ Dyna pam dw i'n galaru a nadu,

a cherdded heb sandalau ac mewn carpiau;

yn udo'n uchel fel siacaliaid,

a sgrechian cwyno fel cywion estrys.

⁹ Fydd salwch Samaria ddim yn gwella!

Mae wedi lledu i Jwda –

mae hyd yn oed arweinwyr fy mhobl

yn Jerwsalem wedi dal y clefyd!

Mae'r gelyn ar ei ffordd

¹⁰ ‛Peidiwch dweud am y peth yn Gath!‛ ^Ref

Peidiwch crio rhag iddyn nhw'ch clywed chi!

Bydd pobl Beth-leaffra ^Ref yn rholio yn y llwch.

¹¹ Bydd pobl Shaffir yn pasio heibio

yn noeth ac mewn cywilydd.

Bydd pobl Saänan yn methu symud,

a Beth-haetsel yn gwneud dim ond galaru –

fydd hi ddim yn dy helpu eto.

¹² Bydd pobl Maroth ^Ref yn aflonydd

wrth ddisgwyl am rywbeth gwell i ddigwydd

na'r difrod mae'r ARGLWYDD wedi'i anfon,

ac sy'n gwasgu ar giatiau Jerwsalem.

¹³ Clymwch eich cerbydau wrth y ceffylau,

bobl Lachish! ^Ref

Chi wnaeth wrthryfela fel Israel

ac arwain pobl Seion i bechu! ^Ref

¹⁴ Bydd rhaid i chi ddweud ffarwél

wrth Moresheth-gath,

a bydd tai Achsib ^Ref yn siomi –

bydd fel ffynnon wedi sychu i frenhinoedd Israel.

¹⁵ Bobl Maresha, ^Ref bydd gelyn yn dod i goncro a dal eich tref,

a bydd arweinwyr Israel yn ffoi i ogof Adwlam ^Ref eto.

¹⁶ Felly, Jerwsalem, siafia dy ben i alaru

am y plant rwyt ti'n dotio atyn nhw.

Gwna dy dalcen yn foel fel y fwltur,

am fod y gelyn yn mynd i'w cymryd nhw'n gaeth.

I'r pen