OBADEIA 1

¹ Gweledigaeth Obadeia.

Dyma beth mae'r Meistr, yr ARGLWYDD, wedi'i ddweud am Edom. ^Ref Cawson ni neges gan yr ARGLWYDD, pan gafodd negesydd ei anfon i'r gwledydd, yn dweud, “Codwch! Gadewch i ni fynd i ryfel yn ei herbyn!”

Bydd Duw yn cosbi Edom^Croes

² Mae'r ARGLWYDD yn dweud wrth Edom: ^Ref

“Dw i'n mynd i dy wneud di'n wlad fach wan;

byddan nhw'n cael cymaint o hwyl ar dy ben.

³ Mae dy falchder wedi dy dwyllo di!

Ti'n byw yn saff yng nghysgod y graig,

ac mae dy gartref mor uchel nes dy fod yn meddwl,

‘Fydd neb yn gallu fy nhynnu i lawr o'r fan yma!’ ^Ref

⁴ Ond hyd yn oed petaet ti'n gallu codi mor uchel â'r eryr,

a gosod dy nyth yng nghanol y sêr,

bydda i'n dy dynnu di i lawr!”^Croes

—yr ARGLWYDD sy'n dweud hyn.

⁵ “Petai lladron yn dod atat ti,

neu ysbeilwyr yn y nos,

fydden nhw ond yn dwyn beth roedden nhw eisiau!

Petai casglwyr grawnwin yn dod atat ti,

oni fydden nhw'n gadael rhywbeth i'w loffa?^Croes

Ond byddi di'n cael dy ddinistrio'n llwyr!

⁶ Bydd pobl Esau ^Ref yn colli popeth;

bydd y trysorau gasglon nhw wedi'u dwyn!

⁷ Mae dy gynghrheiriaid wedi dy dwyllo;

cei dy yrru at dy ffiniau.

Mae dy ‛helpwyr‛ wedi cael y llaw uchaf arnat ti,

a'r ‛ffrindiau‛ oedd yn gwledda gyda ti

wedi gosod trap heb i ti wybod.”

⁸ “Bryd hynny” meddai'r ARGLWYDD,

“bydda i'n difa rhai doeth Edom,

a bydd y deallus yn diflannu o fynydd Esau.

⁹ Bydd dy filwyr dewr wedi dychryn, Teman; ^Ref

fydd neb yn goroesi ar fynydd Esau.

Y drwg wnaeth Edom

O achos y lladdfa,

¹⁰ a'th drais yn erbyn Jacob dy frawd, ^Ref

bydd cywilydd yn dy orchuddio,

a byddi'n cael dy ddinistrio am byth.

¹¹ Pan oeddet ti'n sefyll o'r neilltu

tra oedd dieithriaid yn dwyn ei heiddo;

pan oedd byddin estron yn mynd drwy ei giatiau

a gamblo am gyfoeth Jerwsalem,

doeddet ti ddim gwell nag un ohonyn nhw! ^Ref

¹² Sut allet ti syllu a mwynhau'r

drychineb ddaeth i ran dy frawd?

Sut allet ti ddathlu wrth weld pobl Jwda

ar ddiwrnod eu difa?^Croes

Sut allet ti chwerthin

ar ddiwrnod y dioddef?

¹³ Sut allet ti fynd at giatiau fy mhobl

ar ddiwrnod eu trychineb?

Syllu a mwynhau eu trallod

ar ddiwrnod eu trychineb.

Sut allet ti ddwyn eu heiddo

ar ddiwrnod eu trychineb?

¹⁴ Sut allet ti sefyll ar y groesffordd

ac ymosod ar y ffoaduriaid!

Sut allet ti eu rhoi yn llaw'r gelyn

ar ddiwrnod y dioddef?

Barn Duw a buddugoliaeth Israel

¹⁵ Ydy, mae diwrnod yr ARGLWYDD yn agos,

a bydda i'n barnu'r cenhedloedd i gyd.

Byddi'n diodde beth wnest ti i eraill;^Croes

cei dy dalu'n ôl am beth gafodd ei wneud.

¹⁶ Fel y gwnaethoch chi yfed

ar y mynydd sydd wedi'i gysegru i mi,

bydd y gwledydd i gyd yn yfed ac yfed –

yfed nes byddan nhw'n chwil.^Croes

Bydd fel petaen nhw erioed wedi bodoli.

¹⁷ Ond ar Fynydd Seion bydd rhai yn dianc

– bydd yn lle cysegredig eto.

Bydd teulu Jacob yn ennill y tir yn ôl

oddi ar y rhai wnaeth ei gymryd oddi arnyn nhw.

¹⁸ Teulu Jacob ^Ref fydd y tân,

a theulu Joseff ^Ref fydd y fflamau,

a theulu Esau fydd y bonion gwellt!

Byddan nhw'n eu llosgi a'u difa,

a fydd neb o deulu Esau ar ôl.”

—mae'r ARGLWYDD wedi dweud.

¹⁹ Byddan nhw'n cipio'r Negef oddi ar bobl mynydd Esau,

a Seffela ^Ref oddi ar y Philistiaid.

Byddan nhw'n ennill yn ôl dir Effraim

a'r ardal o gwmpas Samaria,

a bydd pobl Benjamin yn meddiannu Gilead. ^Ref

²⁰ Bydd byddin o bobl Israel o'r gaethglud

yn adennill tir Canaan i fyny at Sareffath; ^Ref

a phobl Jerwsalem sydd yn Seffarad bell

yn meddiannu pentrefi'r Negef.

²¹ Bydd y rhai gafodd eu hachub

yn mynd i Fynydd Seion

ac yn rheoli Edom –

a'r ARGLWYDD fydd yn teyrnasu.

I'r pen